राष्ट्रपतिं देउवायात खिसि याःगु हे खः ला ?

येँ – नेपाली कांग्रेसया सभापति शेरबहादुर देउवाया न्ववाइगु प्रस्ट मजूगुलिं वय्कः अक्सर धइथें हास्यया पात्र जुयादीगु याः । अप्वः धइथें हास्य कलाकारतय्सं वय्कःया नक्कल यानाः दर्शक न्हीकेगु ज्या यानाच्वनी ।

थ्वहे झ्वलय् राष्ट्रपति विद्या भण्डारीं समेत वय्कःयात हे इंगित यासें न्ववानाः स्रोतायात न्हीकादिल धकाः सामाजिक सञ्जालय् आलोचना जूगु दु । म्हीग राष्ट्रिय सभागृहय् जूगु छगू ज्याझ्वलय् सभापति देउवां न्ववानादीधुंकाः राष्ट्रपति भण्डारीं सम्बोधन यानादीगु खः ।

थःगु सम्बोधनय् राष्ट्रपति भण्डारीं सभागृहय् वक्तातय्सं न्ववाःगु बांलाक मथू, अथे खःसां सकस्यां ताली थाःगुलिं बांलाःगु हे न्ववाःगु जुइमाः धकाः अनुमान याना, छु न्ववाःगु धइगु खँ कन्हय् मिडियाय् स्वयाः सीके माली धकाः न्ववानादिल । वक्तातय्सं न्ववाःगु बांलाक मथूगुया दोष वय्कलं अनया साउण्ड सिष्टमयात बियादिल ।

अथे खःसां देउवां न्ववायेधुंकाः राष्ट्रपतिपाखें थज्याःगु अभिव्यक्ति वःगुलिं थ्व वय्कलं देउवायात हे इंगित यासें खिसि यानादीगु धकाः आलोचना शुरु जूगु दु । राष्ट्रपति भण्डारीं ‘थन वक्तातय्सं न्ववाःगु बांलाक मथू’ धकाः न्ववानादीबलय् नं हलय् सकलें ह्वारर्र न्हिलाहःगु खःसा थ्व वय्कलं देउवायात हे इंगित यानादीगु खः धकाः थुइकूगु खः ।

राष्ट्रपति भण्डारीं अन देउवाया नां धाःसा गनं हे कयादीगु मदु ।थुकिया बारे यक्व आलोचना वयेवं राष्ट्रपतिया राजनीतिक सल्लाहकार सुशील प्याकुरेलं राष्ट्रपतिं देउवाया बोली मथुल धाःगु मखुसं खँ मथुल धाःगु खः धासें थुकियात विवादय् महःसा बांलाःगु बिचाः तयादीगु दु ।
गुलिसिनं धाःसा अन प्राविधिक कारणं वक्तातय्सं न्ववाःगु मथूगु हे खःसां राष्ट्रपति थेंज्याःगु गरिमामयी पदय् च्वंम्ह मनुखं उकी टिप्पणी मयायेमाःगु धकाः नं बिचाः बियाहःगु दु ।

सम्बन्धित बुखँ

LEAVE YOUR COMMENTS