इन्जिनियरिङया न्हापांम्ह डीनयात लुमंकल

यल(नेपालभाषा टाइम्स)- इन्जिनियरिङ अध्ययन संस्थानं नेपाःया इन्जिनिरिङ ख्यःया न्ह्यलुवा, इन्जिनियरिङ अध्ययन संस्थानया संस्थापकलिसें न्हापांम्ह डीन कुलरत्न तुलाधरयात लुमंकल । नेपाःया इन्जिनियरिङ ख्यःया न्ह्यलुवालिसें संस्थानया न्हापांम्ह डीन तुलाधरया ३९ क्वःगु पुण्य तिथि लाकाः पूच्वया संस्थानय् च्वंगु वय्कःया झ्वाताय् स्वां देछाःगु खः ।

भिक्षु कोलित महास्थविरपाखें पंचशील प्रदान यासें न्ह्याःगु ज्याझ्वलय् भिक्षु कोण्डन्य महास्थविरं धर्मदेशना बियाबिज्याःगु खः । लिसें वसपोल भिक्षु कोण्डन्यं दिवंतग तुलाधरं नेपाःया इन्जिनियरिङ ख्यलय् यानादीगु योगदान, गुण धर्मया ज्यायात निरन्तर रुपं न्ह्याका वने फयेमा धकाः सुवाः नं बियाबिज्याःगु खः ।

उगु इलय् मदुम्ह तुलाधरया नामं नीस्वनातःगु इन्जिनियरिङय् सर्वोत्कृष्ट ल्याः हःपिंत लःल्हाइगु ‘प्रथम डीन स्व. कुलरत्न तुलाधर स्वर्ण पदक’ पुल्चोक क्याम्पसया स्नाकोत्तर तगिंया आशिष पौडेल व स्नातक तगिंया मय्जु रिति प्रधानांगयात लःल्हाःगु खः ।

क्याम्पस परिसरय् थापना यानातःगु मदुम्ह तुलाधरया झ्वाता न्ह्यःने जूगु ज्याझ्वलय् संस्थानया डीन प्रा. डा. शशीधर राम जोशी उत्कृष्ट विद्यार्थीद्वययात स्वर्ण पदक लःल्हानादीगु खःसा सहायक डीन सुशीलबहादुर वज्राचार्यं दसिपौ व दाताकथं तुलाधरया छेँजःपाखें मय्जु चित्राशोभा तुलाधरं दां सिरपाः लःल्हानादीगु खः । ज्याझ्वः पुण्यानुमोदन यासे क्वचायेकूगु खः ।