जेठ २ लय् लिहां वनेत ओली असहमत

येँ – नेकपा (एमाले)या एकता बल्लाकेगु लागिं थःपिं २०७५ जेठ २ गतेया अवस्थाय् लिहां वनेत तयार दु धाःसां नं प्रधानमन्त्री लिसें पार्टी अध्यक्ष केपी शर्मा ओलीं अदालतपाखें याःगु वहे आशयया फैसलायात धाःसा उल्टे यायेमाः धकाः भ्याकेट निवेदन दर्ता यायेवं वय्कः पार्टी एकताया पक्षय् मदुगु स्पष्ट सीदत धकाः द्वपं बियाहःगु दु ।

सर्वोच्च अदालतं २०७५ या जेठ २ गते तकया केन्द्रीय कमिटीयात जक मान्यता बी फइ धासें वयां लिपा यानातःगु निर्णय अवैध जुइ धकाः फैसला याःगु दु । उगु हे फैसला कथं कर्णाली प्रदेशया माधव नेपाल पक्षीय प्यम्ह सांसदयात ओली पक्षं याःगु कारवाही बदर जूगु खः । आः प्रम ओलीं जेठ २ गते लिपा याःगु निर्णय नं वैध जुइमाः धइगु दावी यासें अदालतय् भ्याकेटया निवेदन बियादीगु खः ।
प्रम ओलीं थ्व निवेदन बियादीवं माधव नेपाल पक्षं उकिया विरोध यासें ओली वास्तवय् जेठ २ गतेया अवस्थाय् लिहां वनेत तयार मदुगु खँ थुकिं स्पष्ट याःगु दावी याना हःगु दु । ओली जेठ २ गतेया अवस्थाय् लिहां वःसा पार्टी एकता यायेत थःपिं तयार दुगु खँ माधव नेपाल पक्षं धयातःगु दु ।

उखे ओलीया थ्व पलाखं यानाः पार्टी एकताया लागिं कुतः यानाच्वंपिं निगूगु पुस्ताया नेतात नं हैरान जूगु दु । ओली थः जेठ २ गतेया अवस्थाय् लिहां मवनेगु खःसां अदालतया फैसलां वय्कःया ‘फेस सेभ’ याना बिउगु बिचाः उमिसं तयेगु यानाच्वंगु खः । तर ओलीं अदालतं धाःसां नं जेठ २ गतेया अवस्थाय् लिहां मवनेगु कुतः यायेवं एमाले एकताया सम्भावना क्षीण जूगु खँ धयाहःगु दु ।

सम्बन्धित बुखँ

LEAVE YOUR COMMENTS