सुपथ मूल्यय् होम डेलिभरी सेवा

येँ (नेपालभाषा टाइम्स) – खाद्य व्यवस्था तथा व्यापार कम्पनी लिमिटेडं नखःचखःया इलय् नं ‘होम डेलिभरी’ सेवायात निरन्तरता बीगु जूगु दु। मोहनि, स्वन्ति नखःयात लक्षित यानाः सुपथ मूल्य पसः संचालन याना वयाच्वंगु कम्पनीं पसः संचालनया इलय् हे होम डेलिभरीयात नं निरन्तरता बीत्यंगु खः ।

थ्व स्वयां न्ह्यः कम्पनीं कोरोना भाइरस रोकथाम व नियन्त्रणया निंतिं सरकारं तयातःगु लकडाउनइलय् नं होम डेलिभरी सेवा बीगु खः । लकडाउन जारी जुयाच्वंगु इलय् सर्वसाधारण खाद्यान्न ज्वलं न्यायेत तापाक वने मफइगु जूगुलिं कम्पनीं न्हापांखुसी उकथंया सेवा सुचारु याःगु खः ।

लकडाउन अवधिइ न्हिं हे थ्यंमथ्यं ख्वीगुलिं मल्याक अर्डर वइगु तर आः धाःसा झिगू झिनिगू जक अर्डर वयाच्वंगु कम्पनीया महाप्रबन्धक मणिराम खनालं कनादिल । वय्कःया धापूकथं लकडाउनया इलय् सुं नं पिहां वने मजिउगुलिं माग अप्वः जूगु खःसा आः धाःसा म्हो जक माग जुयाच्वंगु दु ।

लकडाउन अन्त्य जूगु व यातायात नं सहज जूगुलिं यानाः खास हे अर्डर मवःगु वय्कःया धापू दु। अथे खःसां विक्री कक्ष तक वनाः आवश्यक सामान न्याये मफुपिं उपभोक्तायात लक्षित यानाः होम डेलिभरी सेवायात निरन्तरता बीगु कम्पनीं न्ह्यथंगु दु ।

न्हापा कम्पनीं जक सामान विक्री याना वयाच्वंगु थासय् आः साल्ट ट्रेडिङ व दुग्ध विकास संस्थानलिसे सहकार्य यानाः स्वंगुलिं संस्थाया खाद्यान्न व खाद्य सामग्री छगू हे थासं सुपथ मूल्यय् विक्री वितरण यायेगु ज्या जुयाच्वंगु दु। सुपथ मूल्य पसःलिसें होम डेलिभरीइ नं सुपथ मूल्यया भावं हे उपभोक्तां आवश्यक सामग्री काये खनीगु कम्पनीं जानकारी बिउगु दु ।