अन्तर्राष्ट्रिय बागवानी प्रदर्शनीइ नेपाःपाखें ललित मण्डप

येँ – फ्रान्सय् जुयाच्वंगु झिंनिक्वःगु अन्तर्राष्ट्रिय बागवानी प्रदर्शनीइ नेपाःपाखें ललित मण्डप आर्ट एण्ड आर्किटेक्ट प्रा.लिं ब्वति काःगु दु । ‘कोमेट डेस फ्लोरालिज’या ग्वसालय् जुयाच्वंगु थ्व प्रदर्शनी फ्रान्सया नान्टेसय् वंगु छवाः न्ह्यव बिहिवाः निसें सुरु जूगु खः ।

थौं आइतवाः तक जुइगु थ्व प्रदर्शनी नेपाःपाखें ब्वति काःगु ललित मण्डप आर्ट एण्ड आर्किटेक्टं नेपाः हर्टिकल्चर, हार्मोनि व बुद्धिजमया थिमय् नेपाःया बागवानी न्ह्यब्वःगु खः ।

कम्पनीं धाःकथं प्रदर्शनीइ नेपाःया तराई, पहाड व हिमालय् दइगु स्वां, सीमा, सिसाबुसा, तरकारि न्ह्यब्वयेगु, नेपालय् जुइगु थीथी जात्रा पर्वय् छ्यलीगु स्वांया बारे जानकारी बीगु, नेपाःया संस्कृतिइ स्वां, सिमा, सिसाबुसा, तरकारिया महत्व बारे ब्वयेगु ज्या जूगु खः ।

अथेहे हार्मोनि थिमय् नेपाःया भौगोलिक स्थिति, साँस्कृतिक, सामाजिक, भौगोलिक विविधता बारे न्ह्यब्वयेगु ज्या जूगु खःसा बुद्धिजम थिमय् बुद्ध बूगु नेपाः, नेपालय् बुद्ध धर्म, विश्व शान्तिया सन्देश न्ह्यब्वयेगु ज्या जूगु खः ।

ललित मण्डपं थ्वयां न्ह्यः टर्की जूगु अन्टालिया वल्र्ड एक्स्पो व ताइवानय् जूगु ताइ चुंग वल्र्ड एक्स्पोय् नं ब्वति कायेधुंकूगु दु ।