येँ महानगरपाखें प्यंगू करोड राजस्व संकलन
येँ- येँ महानगर पालिकां वंगु छुं दिं थुखे प्यंगू करोड तका राजस्व संकलन याःगु दु । येँ महानगरं घरजग्गा व सम्पत्ति कर पुलेगु वास्ता मयासे च्वनाच्वंपिं करदातायात थीथीकथं ताकेता यायेवं प्यंगू करोड राजस्व संकलन याःगु खः ।
येँ महानगरं ताःई न्ह्यवंनिसें कर पुलेगु खँय् वास्ता मयासे च्वनाच्वंपिं करदाताया छेँय् छेँय् वनाः नां सार्वजनिक यायेगु, माइकिङ यायेगु नापं लिपांगु इलय् पञ्चेबाजं थायेगु अभियान न्ह्याकूगु खः । येँ महानगरं ताःई न्ह्यवंनिसें उकथं कर मपूपिं थीथी सरकारी निकाय, संघसंस्था, व्यापारिक संस्था, व्यक्तिया छेँय् छेँय् वनाः ‘कर पुले नु’ धइगु नारालिसें उकथं दबावमूलक अभियान न्ह्याकूगु खः ।
पञ्चेबाजं थायेगु याना हयेवं छुं व्यक्ति व संस्थां याकनं कर पुलेगु प्रतिवद्धता तकं प्वंकूगु खः । थुकथं लिपांगु छुं दिं थुखे थीथी संघसंस्था, निकाय व व्यक्तिपाखें प्यंगू करोड न्यागू लख कर संकलन जूगु येँ महानगर राजस्व विभागया प्रमुख डा. शिवराज अधिकारीं कनादिल ।
विभागयाकथं कर मपूपिनिगु धलखय् नेपाल विद्युत प्राधिकरण, खाद्य संस्थान, साझा भण्डार, कर्मचारी संचय कोष, नेपाल क्षयरोग केन्द्र, नेशनल टे«डिङ लिमिटेड लगायत सरकारी निकायं सम्पत्ति व कर बुझे याःगु मदु ।
येँ महानगरं अज्याःपिं करदातातय् कर पू वयेत धासें दकलय् न्हापां वंगु असार १६ गते न्हापांखुसी २३ म्ह व्यक्ति व व्यवसायीया नां सार्वजनिक याःगु खः । वयां लिपा साउनया २४ गते निक्वःखुसी ५२म्ह व्यक्ति व व्यवसायी यानाः ७५ म्हेसिया नां सार्वजनिक याःगु याःगु खः ।
नां सार्वजनिक याःपिंमध्ये छुं दिं न्ह्यः जक १० म्हेसिनं आंशिक रुपं कर पूगु खः । अबलय् २ गू करोड ४९ गू लाख राजस्व संकलन याःगु खः । उगु इलय् २० म्हेसिनं विवरणसहित कर बुझे यायेगु प्रतिवद्धता प्वंकूगु खः । अनंलि येँ महानगरं सम्पर्कय् मवःपिनिगु हकय् भदौ २४ निसें प्रचलित कानूनकथं कारवाही यायेगु नापं सेवा बन्द यायेगु धाःगु खः ।
महानगर श्रोतयाकथं थीथी निकाय, संघसंस्था, व्यक्तिया छेँबुँ सम्पत्ति कर वापत आतकया दुने ६५ गू करोड स्वयां अप्वः कर संकलन याये ल्यं दनि । कर पुलेमाःपिंसं वास्ता मयायेवं न्हापां सम्बन्धित वडा ज्याकूपाखें इलय् कर पुलेत धासें सचेत याःगु खःसां वडापाखें उगु ज्या याये मफयेवं महानगर थम्हं हे थीथीकथंया अभियानलिसें कर संकलन यायेगु ज्या न्ह्याकूगु खः।
LEAVE YOUR COMMENTS