प्रेस काउन्सिलपाखें पत्रकारयात आर्थिक ग्वाहालि

येँ (नेपालभाषा टाइम्स) – प्रेस काउन्सिल नेपालं आर्थिक अवस्था कमजोर जूपिं पत्रकार व संचारकर्मियात आर्थिक ग्वाहालि याःगु दु। प्रेस काउन्सिलं आर्थिक अवस्था कमजोर जूपिं पत्रकार व संचारकर्मिपिंत वासः यायेत उकथं आर्थिक ग्वाहालि याःगु खः ।

काउन्सिलया कार्यवाहक अध्यक्ष गोपाल बुढाथोकीया अध्यक्षताय् च्वंगु बैठकं पत्रकार व संचारकर्मितय्त वासःया निंतिं उपचार सुविधा बीगु निर्णय याःकथं उगु आर्थिक ग्वाहालि याःगु खः । काउन्सिल अन्तर्गतया पत्रकार कल्याण कोष उपसमितिया बैठकं पत्रकार व संचारकर्मिं बिउगु आवेदनया लिधंसाय् थीथी संचारमाध्यमय् आवद्ध जुयाच्वंपिं पत्रकार-संचारकर्मियात उगु आर्थिक ग्वाहालि यायेगु निर्णय याःगु खः ।

उपसमितिया बैठकया निर्णयकथं काउन्सिलं किरणमान वज्राचार्य, अजय सन्तोषी राई, हरिबहादुर लम्जेल, घनश्याम आचार्य, महेशप्रसाद अवस्थी, वनराशी बर्मा, शर्मिला विश्वकर्मा, दिपेन्द्र शर्मा, ध्रुव बिसी, प्रतीक्षा शर्मा, जीवनकुमार चलाउने लगायत झिंस्वम्ह संचारकर्मियात आर्थिक ग्वाहालि याःगु खः । वय्कःपिंत ल्वय्या प्रकृति स्वयाः गुद्वःनिसें स्वीद्वः तका तक आर्थिक ग्वाहालि यानागु काउन्सिलं जानकारी बिउगु दु ।