सत्यमोहन हनेत ग्वय्दां लःल्हात

ख्वप – वाङ्मय शताब्दी पुरुष सत्यमोहन जोशीयात तःजिक हनेगु निंतिं वय्कःयात ग्वय्दां लःल्हात । म्हिगः सोमवाः सुथय् यलध्वाखां सांस्कृतिक बाजंलिसें वय्कःया छेँ बखुंबहालय् वनाः ग्वय्दां लःल्हाःगु खः । ख्वपया थीथी खलः पुचःया प्रतिनिधिपिं तपालं सुरुवाः फिनाः यलध्वाखाय् मुनाः सगं ज्वनाः वनाः ग्वय्दांलिसें ख्यें सगं नं लःल्हाःगु खः ।

शताब्दी पुरुष जोशीयात ख्वपं प्रतिनिधित्व याना वःपिं मिसातय्सं वय्कःयात सगं बिउगु खःसा वयां लिपा शताब्दी पुरुष सत्यमोहन जोशी नागरिक अभिनन्द समारोह समितिया नायः नरेन्द्रभक्त हाडां जोशीयात ब्वना पौ लःल्हाःगु खः । थ्व हे वइगु असार ६ गते जोशीयात ख्वपय् तःजिक नागरिक अभिनन्दन याइगु ज्याझ्वः दु ।

वकुन्हु मध्यपुर थिमिया बहाखा बजाःनिसें थिमि बालकुमारितक ¥याली याना हयाः अनं वय्कःयात स्कर्टिङ यानाः दत्तात्रय चोकतक यंकेगु ज्याझ्वः दु । अनंलि तःजिक सांस्कृतिक ¥याली यानाः तःमारिं जुयाः अजिमा पार्टी पालेसय् थ्यंकाः नागरिक अभिनन्दन यायेगु ज्याझ्वः तयातःगु दु ।

उगु इलय् थनया सछिगू स्वयां अप्वः संघसंस्थापाखें वय्कःया म्हधिकःपाःगु हनापौ नं लःल्हायेगु तयारी जुयाच्वंगु दु । अथे हे नागरिक अभिनन्दनय् ब्वति कायेगु निंतिं ख्वपवासीपाखें जिल्ला समन्वय समितिया प्रमुख नवराज गेलालं वय्कःयात ब्वनादीगु खः ।