व्यापक हल्ला याइ !
अखबारय् ब्वने । कमरेड प्रचण्डं धाइ, जिं अनेक नेतातय्त प्रधानमन्त्री याना । जस्तै । माधवकुमार नेपाल, झलनाथ खनाल, डा. बाबुराम भट्टराई । आः छि छम्हेसित नं प्रधानमन्त्री यायेगु जिगु तःधंगु इच्छा । थुकिया निंतिं जि न्ह्यागु यायेत नं तयार । छिं विश्वास यानादिसँ ।’ कमरेड प्रचण्डं कमरेड वामदेवयात प्रधानमन्त्री याना बीगु थःगु इच्छा कनी । विचरा चुनावय् बुनाः कू नयाच्वंम्ह वामदेवया नुगः थकाइ । हावा भरे याइ । पासापिनि पुचलय् प्रम जुइ मखनाः वाथावाथा कनाच्वंम्ह कमरेड वामदेवं थःगु प्रम जुइगु स्वप्न पूवनीगु कल्पना याइ ।
चुनावय् बूम्ह जूसां च्वय्या सदनय् राष्ट्रपतिपाखें मनोनित जुइ । चुनाव बूम्हेसित गुगुं नं संवैधानिक पदय् नियुक्ति यायेगु संविधानं मबिउ । उकिं वामदेवयात च्वय्या (राज्यसभाय्) सदनय् सदस्यता बी मजिउ धकाः सर्वोच्च अदालतय् उजुरी तइ । सर्वोच्चं कमरेड वामदेवयात च्वय् या संसदया सदस्यता बिउसां मन्त्री पदय् हयेत संविधानं मबिउ । आदेश बी । थुकथं वामदेवया शक्तिइ वयेगु म्हगस चकनाचूर जुइ । आः कमरेड वामदेवया थ्व खँय् गज्याःगु प्रतिक्रिया वइ ? राजनीतिक दृष्टिं व रोचक जुइ । वामदेवयात मनोनित सदस्य यानाः प्रम ओलीं वामदेवलिसे राजनीतिक समझदारी क्यंगु खनेदु। अझ महत्वपूर्ण मन्त्री पद बीगु हल्ला नं प्रचूर मात्राय् जूगु खः । कमरेड प्रचण्डं ला प्रधानमन्त्री हे यायेगु बचं बियाः कमरेड वामदेवयात सिमा गयेकूगु खः । तर सर्वोच्चया आदेश वसेंलि प्रम ओली व कमरेड प्रचण्डं वामदेवयात अःखबतं सिमा गयेकूगु जक खः । वय्कःपिंसं वामदेवयात शक्तिइ वयेगु निषेध यासें बिउगु आदेश बारे न्हापांतुं सिउ ।
अझ ला वामदेवयात शक्तिइ महयेत जानाजानि थज्याःगु अदालती आदेश वयेवं वय्कःपिंसं प्रभावित याःगु दु धइगु प्रतिक्रिया वामदेव पक्षधरपिंसं क्यंगु दु। थौं देशय् शक्तिया निंतिं नेतातय्सं न्ह्यागु नं यायेत लिफः मस्वइगु स्थितिइ चुर्लुम्म दुनाच्वंगु दु। सुनां सुयागु विरोधय् छु याइ? सुनां छु मया? धाये फुगु अवस्था मदु। देय्या समृद्धि, विकास, उन्नतिया नामय् जुइगु क्यह्यंगु खेल थ्व हे खः । चुनावय् बूम्ह कमरेड वामदेवया खुं लुखां सांसद जुइगु महत्वाकांक्षायात घृणाया मिखां स्वइपिंसं वामदेवयात शक्तिइ वये मदइगु सर्वोच्चया आदेशयात स्वागत याःगु दु। नेतातय्व्य क्तिगत स्वार्थ, महत्वाकांक्षाया निंतिं संविधानयात न्ह्यवःसा याये दइमखु धइगु सतर्कता, नसियत सर्वोच्चया आदेशं बिउगु दु। जनधारणाया धापू दु ।
आम जनतां चुनावय् बूम्ह वामदेवयात सांसद याःगु खँय् छखेर असन्तोष प्वंकूगु दुसा मेखेर देयेयात लोडशेडिबं मुक्ता यानाः झः झः धायेके सफल जूम्ह विद्युत प्राधिकरणया कार्यकारी निर्देशक कुलमान घिसिबयात हाकनं छक्वः कार्यकारी निर्देशकय् पुनःनियुक्ति मयाःगु खँय् आक्रोश प्वंकूगु दु। कुलमानया पक्षय् देशय् जनस्तरं तःधंगु जनदबाव वःगु खः । तर सरकारं जनदबावयात लत्रे यानाः अझ कुलमानया पक्षय् सः थ्वयेकूपिंत पुलिस प्रशासन छ्यलाः कसा बिल ।
टेलिभिजनया छगू ज्याझ्वलय् प्रधानमन्त्रीया पे्रस सल्लाहकार सूर्य थापायाके देय्यात अन्धकारं मुक्त याःम्ह कुलमानयात जनदबावया बावजूद नं छाय् पुनःनियुक्ति मयाःगु धकाः न्यंगु न्ह्यसःया लिसलय् धाइ, ‘देय्यात लोडशेडिङपाखें मुक्त याःगुया जस, श्रेय पूर्णतया कुलमानयात जक बीगु अतिरञ्जित ख, सत्य तथ्य मखु। लोडशेडिङ अन्त्य याःगु खँय् यक्वसिया योगदान दु। कुलमान छम्हेसिया जक जयगान यायेगु अनुचित खः।’ तर प्रमया प्रेस सल्लाहकारयात न्ह्यसः तये फइ ‘देय्या प्रधानमन्त्रीं थथे याना अथे याना धकाः धाकधक्कु त्वःतेगु नं उचित मखु। प्रधानमन्त्रीं जक देय् दयेकूगु खः ला? लखौं मनूतय् योगदान दु।’ प्रेस सल्लाहकारं सीकेमाः कि गुगुं नं संस्थाय् नेतृत्वया व्यक्तिगत योगदान नं दयाच्वनी । प्रतिभाशाली, सक्षम नेतृत्वया कुशल व्यवस्थापनं गुगुं नं संस्थां सफलता बी फइ ।
विद्युत प्राधिकरणया पूर्व कार्यकारी निर्देशक कुलमानया इच्छाशक्ति, व्यवस्थापनया कुशलता,जनताप्रतिया प्रतिवद्धता, इमान्दारितां देय्यात अन्धकारं मुक्त यायेत विशेष भूमिका म्हितूगु दु। प्रधानमन्त्रीजुया चम्चा प्रेस सल्लाहकारं कुलमानया योगदानयात न्यूनीकरण यानाः गुगु छुद्र तर्क बिल व आम जनविरोधी धारणा खः । कुलमानया पद प्रचण्डया कोटाय् लाः । प्रचण्डं कुलमानया प्रस्ताव प्रमयाथाय् यंकूबलय् प्रमजुं आलताल यात । स्वीकृति मबिउ । छथ्वःसिनं कुलमानयात पुनःनियुक्ति मबिउगु प्रम ओलीया कारणं खः। हल्ला याइ । तर थुकिया विपरित पक्षं प्रचण्ड पक्षं कुलमानयाके करोडौं दां फ्वन, पुनःनियुक्तिया लागिं । दांया कालबिल मजूगुलिं सम्बन्धित पक्षं कुलमानयात मस्वःगु खः । थुकी प्रम ओलीया ल्हाः मदु। व्यापक हल्ला याइ ।
LEAVE YOUR COMMENTS