इवामुरा हस्पतालय् प्रदर्शन

ख्वप (नेपालभाषा टाइम्स) – थनया इवामुरा अस्पतालं सीधुंकल धाम्ह मनू म्हिगः नर्भिक अस्पतालय् यंकाः वासः याकूगु दु। इन्डोस्कोपी यायेत वंम्ह ४७ दँया लक्ष्मीकुमार लाखाजुया ज्यान जोखिमय् लाकूगु धासें अस्पताल विरुद्ध स्थानीय जनतां प्रदर्शन नं याःगु दु। अस्पतालं लापर्वाही याःगु धासें स्थानीय जनतां प्रदर्शन याःगु खः ।

लाखाजुया म्हिगः नर्भिक अस्पतालया भेन्टिलेटरय् तयाः वासः यायेगु ज्या जुयाच्वंगु दु। इवामुरां सीधुंकल धायेवं थःपिसं थप उपचार यायेमाः धकाः हालेवं इवामुरां विरामी लाखाजुयात नर्भिक अस्पतालय् यंकूगु खः । फर्निचरया ज्या याना वयाच्वंगु लाखाजु न्यासि वनाः हे अस्पतालय् इन्डोस्कोपि याकेत वंगु खः । घटनायात कयाः स्थानीय जनतां छानविन यायेमाःगु माग नं याःगु दु ।