किपू नपाया गुक्वःगु नगरसभा भर्चुअल माध्यमं

किपू- किपू नगरपालिकाया गुक्वःगु नगरसभा भर्चुअल (वेबिनार) माध्यमं जूगु दु । स्थानीय सरकार संचालन ऐनकथं वंगु असार १० गते दुने वइगु आर्थिक दँ ०७८÷७९या निंतिं स्थानीय निकायया बजेटलिसें नीति तथा कार्यक्रम पेश यायेमाःगु व्यवस्था जूकथं नगरपालिकाया नगरसभा जूम अनलाइन प्रविधि मार्फत च्वंगु खः ।

कोरोना संक्रमणया महामारीया जोखिमयात ध्यानय् न्हापांखुसी उकथं जूम प्रविधिया माध्यमं किपू नगरपालिकाया नगरसभा च्वंगु खः । किपू नगर प्रमुख रमेश महर्जनं गुक्वःगु नगरसभाया ब्यानर वाचन यानाः उलेज्या यानादीगु ज्याझ्वलय् किपू नपा वडा नं ७या मदुम्ह वडाअध्यक्ष राजकुमार मालीलिसें ज्ञात अज्ञात शहीदया लुमन्तिइ छगू मिनेट मौन धारण यानाः ज्याभ्mवः न्ह्याःगु खः ।

नगर सभाया बैठकय् प्रमुख प्रशासकीय अधिकृत सीता परियारं मुँज्याय कार्यतालिका ब्वनाः न्यंकादीगु खःसा उपप्रमुख सरस्वति खड्कां वइगु आर्थिक दँ ०७८÷७९या नीति तथा कार्यक्रम व आर्थिक विधेयक २०७८ ब्वनाः न्यंकादीगु खः ।

ज्याभ्mवलय् नगर उपप्रमुख खड्कां वइगु आर्थिक दँया निंतिं १ गू अर्ब १९ गू करोड ख्वीन्यागू लख ग्वीप्यद्वः तका दां बराबरया अनुमानित आय व्यव विवरण न्ह्यब्वयादीगु खः । नीति तथा कार्यक्रम बजेट न्ह्यब्वयेगु झ्वलय् नगरवासीया छेँय् छेँय् स्थानीय सरकारया ज्याझ्वःयात अझ परिस्कृत याना यंकेगु ल्याखं नगर दुने सुयां छेँय् मचा बुल धाःसा स्वद्वः तका व नगरवासी सुं दिवंगत जुल धाःसा झिद्वः तका नगरपालिकां ग्वाहालि यायेगु प्रस्ताव नं न्ह्यब्वयादीगु खः ।

थुकथं हे किपू नगर दुनेया परम्परागत, सांस्कृतिक ऐतिहासिक बाजं, संस्कृति, जात्रा पर्व संरक्षण व संवद्र्धन यायेगु ज्यायात निरन्तरता बिया वनेगु, नगर दुने च्वना वयाच्वंपिं दक्वं जात, समुदाययात प्राचीन मौलिक भाषा, कला, संस्कृति, भेषभूषा, नखःनखःया नं प्रवद्र्धन, संरक्षण यानाः अझ प्रभावकारी याना यंकेगु भाषा, लिपिया विकास, नेपालभाषा साहित्य नखः, दाफा संस्कृतियात प्रोत्साहन बीगु नं प्रस्ताव याःगु दु ।

अथे हे नगरया ज्याथजिथिपिंत निःशुल्क वासः वितरण, दक्वं वडाय् ल्याय्म्ह पुस्तायात लक्षित यानाः ज्याझ्वः हयेगुलिसें दक्वं वडाय् वडास्तरय् व नगरय् केन्द्रस्तरय् ल्याय्म्हतय् संजाल गठन, युवा परिषद्या गठन यायेगुलिसें किपू नगरपालिकायात बालमैत्री व वातावरणमैत्री नगरपालिकाया रुपय् स्थापनाया निंतिं नं योजना हयेगुकथं प्रस्ताव याःगु दु ।
नगरसभाया न्हापांगु दिंया बैठकय् नीति तथा कार्यक्रमया न्ह्यब्वयेधुंकां नगरया झिगुलिं वडाया वडाअध्यक्षपिंसं थःथःगु धारणा तयादीगु खः । नगरसभाया निगूगु बैठक वइगु सोमवाः च्वनेत्यंगु दु ।

सम्बन्धित बुखँ

LEAVE YOUR COMMENTS