यज्ञरत्न धाख्वाःया मिसा पासा बारे अन्तक्र्रिया

ख्वप(नेपालभाषा टाइम्स)÷ नांजाःम्ह चिबाखं च्वमि यज्ञरत्न धाख्वाःया लिपांगु चिबाखं मुनाः मिसा पासाया बारे सिर्जना अभियान समाजं छगू दुवाला ज्याझ्वः याःगु दु । ख्वपया ख्वप छेँ रेष्टुरेण्टय् जूगु ज्याझ्वलय् समीक्षक व च्वमि धु्रब मधिकर्मिं झीगु साहित्यय् यक्व यायेमाःगु दु, छुं जुयाच्वंगु मदु उकिं छुं छुं ज्या जूसां याना वनेगु ताः तयाः थुगु सफूयात कयाः अन्तक्र्रिया यानागु खः धयादिल । वय्कलं झिंच्यापु बाखंया समीक्षा यानादिसें संघर्षशील भावनां पिज्वःगु बाखं नं वय्कलं च्वयादीगु खँ कनादिल ।

मेम्ह समीक्षक प्रेमहिरा तुलाधरं न्हापा जुजुपिनि गुणगान यायेत जक बाखं च्वयेगु परम्परा दुगुलि आः आधुनिक लेखकतय्सं ख्वयाच्वंपिंत न्हिइकेगु व न्हिलाच्वंपिंत ख्वयेकेगु क्षमता सहित बाखं च्वयेगु परम्परा सुरु जूगु कनादिल । ज्याझ्वलय् प्रेमहिरा तुलाधरं झिंन्हय्पू व धु्रब मधिकर्मिं झिंच्यापू मिसा पासा दुने च्वंगु बाखं यानाः स्वीन्यापू बाखंया समीक्षा याःगु खः । सहभागीतय्पाखें साहित्यकार जितेन्द्र रसिकं नेवाःत निर्णायक जुइ मफयाच्वंगु खँ कनादीगु ज्याझ्वः पद्मा खयरगोलीं न्ह्याकादीगु खः ।