त्रियुगाय् लाखे प्याखं संरक्षणय् नेवाःत

येँ(नेपालभाषा टाइम्स)- त्रियुगाया स्थानीय नेवाःत लाखे प्याखं संरक्षण यायेगुलिइ सक्रिय जूगु दु । त्रियुगा नगरपालिका लागाय् च्वना वयाच्वंपिं नेवाःत मौलिक संस्कृतिया लाखे प्याखं संरक्षणय् न्ह्यचिउगु खः ।

स्थानीय नेवाःतय्सं लाखे प्याखं संरक्षणलिसें प्रवद्र्धन यायेगु ल्याखं वंगु गुंपुन्हिनिसें सदरमुकाम गाइघाट बजारय् थीथी थासय् प्याखं क्यनेगु शुरु याःगु खः । स्थानीय नेवाःतय्सं मंकाःकथं थ्व प्याखं क्यनेगु शुरु याःगु नेवाः झीगु पुचः उदयपुरया नायः ज्ञानेन्द्र श्रेष्ठं कनादीगु दु ।

पुचःया जिल्ला छ्याञ्जे रत्न श्रेष्ठयाकथंं थ्व प्याखं त्रियुगा नगरपालिकाया गाइघाट बजाः, बोक्से, राजाबास, चुहाडे, बगाहा, देउरी, जोगिदह, मोथ्याई, असारी, भातीखक, पुलांगु गाईघाट बजारय् च्वना वयाच्वंपिं नेवाःतय्सं च्याम्ह लाखे तयार यानाः मंकाःकथं क्यनेगु शुरु याःगु खः ।

लोप जुइगु अवस्थाय् थ्यनेधुंकूगु थ्व प्याखं संरक्षण यायेमाःगु अतिकं आवश्यक जूगु स्थानीय भागवत श्रेष्ठं धयादीगु दु । ल्याय्म्ह पुस्ताया दथुइ लानाच्वंगु पाश्चात्य संस्कृतिया प्रभावं मौलिक संस्कृतिया लाखे प्याखं लोप जुइगु अवस्थाय् थ्यंगु पुचःया दांभरिं दिनेश श्रेष्ठया धापू दु ।

नेपाःया पूर्वी पहाडी जिल्ला खोटाङ, ओखलढुङ्गा, भोजपुर, सङ्खुवासभा, रामेछाप, येँ, काभ्रे लगायतया जिल्लां बसाइँ सरे जुया वःगु व तराई वयेधुंकाः लाखे प्याखं संरक्षण यायेगु ल्याखं दँय्दसं प्याखं क्यनेगु याना वयाच्वंगु दु ।