सक्व व वज्रयोगिनीयात विश्व सम्पदाय् तयगु निंतिं पहल यायेत माग
येँ (नेपालभाषा टाइम्स)÷ सक्व देय् व थनया वज्रयोगिनी देगःयात विश्व सम्पदा धलखय् तयेगु निंतिं पहल यायेत माग जूगु दु । संघीय सांसद सोविता गौतमं वइगु आर्थिक दँ २०८०÷८१ या नीति व कार्यक्रमय् थ्व खँ दुथ्याकेमाःगु माग याःगु खः । संसदय् न्ह्यब्वःगु नीति व कार्यक्रमय् संशोधन प्रस्ताव तसें सांसद गौतमं कपिलवस्तुया तिलौराकोट व जनकपुरया जानकी देगःया लिसें सक्व व वज्रयोगिनीयात नं विश्व सम्पदा धलखय् तयेगु निंतिं पहल यायेमाःगु खँ धाःगु खः ।
सांसद गौतमया थुकिया लिसें कृषि, पूर्वाधार, सांस्कृतिक सम्पदा संरक्षण, स्वास्थय क्षेत्रय्या नीति तथा कार्यक्रमय् नं संशोधन प्रस्ताव तःगु दु । नीति तथा कार्यक्रमय् तयातःगु ‘रैथाने बाली, बिउबिजन, नश्ल व कृषि तथा पशुपंक्षी जैविक विविधता संरक्षणय् स्थानीय तह व समुदाययात प्रोत्साहित यायेगु जुइ’ धकाः धयातःगु खँपुया थासय् ‘स्रोत विनियोजन यानाः जिम्मेवारी दयेकेमाः’ धयागु खँपु तयेमाःगु प्रस्ताव तःगु खः ।
अथेहे जग्गाया मुआब्जा विवादया कारणं आयोजनाया लागत अप्वया वनाच्वंगु अवस्थाय् ततःधंगु आयोजना दयेकेगु ज्या सहज यायेत विशिष्टकृत संरचना दयेकेमाःगु व योजना पूवनीगु सुनिश्चित जुइधुंकाः जक जग्गा रोक्का यायेगु कानुनी व्यवस्था यायेमाःगु सुझाव नं सांसद गौतमया दु ।
LEAVE YOUR COMMENTS