रुसी सेनाय् नेपाःमि बारे अध्ययन समिति

येँ (नेपालभाषा टाइम्स)- श्रम, रोजगार तथा सामाजिक सुरक्षा मन्त्रालयं रुसी सेनाय् नेपाःमित नं दुहां वनाच्वंगु बारे अध्ययन यायेत उपसचिव दिपक ढकालया अध्यक्षताय् स्वम्ह दुजः दुगु समिति दयेकूगु दु । समितिं झिंन्यान्हु दुने रिपोर्ट बी ।

रुस–युक्रेन युद्धय् लानाः रुसी सेनाया प्यम्ह नेपाःमि सीगु घटना सार्वजनिक जुइवं श्रममन्त्री शरदसिंह भण्डारीं थ्व अध्ययन समिति दयेकूगु खः । रुस–युक्रेन युद्धय् लानाः स्याङ्जाया प्रितम कार्की, दोलखाया राजकुमार रोक्का, इलामया गंगाराज मोक्तान व गोरखाया सन्दिप थपलिया सीगु खः ।

वंगु कार्तिक २९ गते रोक्का, मोक्तान व कार्की तालिमया झ्वलय् सीगु खःसा थपलिया असार २९ गते युक्रेनया बाखमुतय् सीगु खः । थ्व बाहेक मेपिं नेपाःमित नं थ्व युद्धय् लानाः सीगु आशंका याःगु दु । समितियात रुसी सेनाय् नेपाःमियात छ्वयेगु भूमिका म्हितूपिं शैक्षिक परामर्शदाता व ट्राभल एजेन्सीयात म्हसीकेगु जिम्मेवारी नं बिउगु दु ।

उकथं हे समितियात अवैध रुपं छेँज्या याइपिं ज्यामित यंकीगु गिरोह बारे अध्ययन यायेत नं अधिकार बिउगु दु । नेपाःया मिसापिंत भिजिट भिसाया नामय् अवैध रुपं अरबया थीथी देशय् यंकाः थीथी कथंया शोषण जुयाच्वंगुलिं यानाः उकियात कयाः नं अध्ययन यायेत अधिकार बिउगु खँ मन्त्रालयं धाःगु दु ।