ने. सं. ११४६ बछलाथ्व पारू - बुंगद्यःरथय् तइगु / याेगबीरसिं बुदिं

कोरोनां पर्यटन लागाय् लाकूगु लिच्वः

सरकारं सन् २०२० यात नेपाल भ्रमण वर्षकथं हनेगु तयारी याःगु खः । थ्व झ्वलय् संस्कृति, पर्यटन तथा नागरिक उड्यनमन्त्री रवीन्द्र अधिकारी ताप्लेजुंगय् जूगु हेलिकप्टर दुर्घटनाय् लाना मंत । वयां लिपा पार्टी सचिवकथं ताः ईतक ज्या यायेधुंकूम्ह योगेश भट्टराईयात नेपाल सरकारया पर्यटनमन्त्रीइ नियुक्त यात । देश विदेशय् नेपाल भ्रमण वर्ष–२०२० बारे ब्यापक प्रचार जुयाच्वंगु इलय् हे चीनया हुवेइ प्रान्तय् नोबेल कोराना भाइरसया महामारी खनेदत । वयां लिपा नेपालय् चीनिया नागरिकं भ्रमण याइगु इच्छां तयारी याःगु नेपाल भ्रमण वर्ष ध्याकुनय् लाःवन । विश्व पर्यटन दिवस हनाच्वंगु थ्व इलय् नेपालय् नीगू लख पर्यटक दुकायेगु म्हगस चकनाचूर जूवंगु दु। विश्वब्यापी रुपय् लाःगु कोरोना भाइरसया प्रभावं थ्व स्थिति ब्वलंगु खः । धायेत ला सरकारं पूर्ण रुपं तयारी यानाः करोडौं करोड खर्च यायेधुंगु खँ धाःगु दु। तर पुसया निगूगु वालय् सुरु जूगु भ्रमण वर्षया औपचारिक उलेज्या व होटेल बुकिंग बाहेक मेगु छुं नं ज्या धाःसा मजुल ।

नेपाः छगू पर्यटन गन्तब्य जुइफइगु आपालं सम्भावना दुगु थाय् खः । थन विश्वय् गनं मदु थेंज्याःगु सुन्दर हिमश्रृंखला दु। विश्वया दकलय् तजाःगु सगरमाथा दु। उलि जक मखु कि हिमताल, हिमालय पर्वत, पहाड, खुसि व वन्यजन्तु, निकुञ्ज नं प्राकृतिक रुपं तयार जुयाच्वंगु विश्व सम्पदात खः । अथेहे सांस्कृतिक सम्पदात नं उलि हे च्वन्ह्यानाच्वंगु दु। स्वनिगः दुने लाःगु विश्व सम्पदा ख्वप लाय्कू, यल लाय्कू, हनुमानध्वाखा लाय्कू लागा उलि हे च्वन्ह्याःगु पर्यटन गन्तव्य स्थलत खः । पशुपतिनाथ, चाँगुनारायण, बौद्ध, स्वयम्भू, लुम्बिनी लागा मेगु विश्व सम्पदा दुने लाःगु विश्वया पर्यटक आकर्षित याइगु थाय् खः । थज्याःगु अमूल्य सांस्कृतिक सम्पदा व विश्वस्तरया प्राकृतिक सम्पदाया कारणं नं दँय्दसं लखौंलख पर्यटकत नेपाः भ्रमणया लागिं वयेगु यानाच्वंगु खः । थज्याःगु महत्वपूर्ण घडीइ नेपालय् नीस्वदँ लिपा हाकनं छक्वः नेपाल भ्रमण वर्ष हनेत्यंगु खः । तर कोरोना भाइरसया कारणं थ्व ज्याझ्वः स्थगन जूवन ।

नेपाः भगवान गौतम बुद्धया जन्मस्थल खः । उकिं नं अरबौंया ल्याखय् जनसंख्या दुगु देय् चीनं गौतम बुद्धया जन्मभूमि लुम्बिनीया भ्रमण यायेगु इच्छां थन छुं छगू प्रतिशत जक चीनिया नागरिक नेपाः भ्रमणय् वल धाःसा थन आपालं पर्यटन ब्यवसाय विकासया आधार तयार जुइ । उकिं चीन, भारत, अमेरिका, बेलायत, फ्रान्स, इटाली, जर्मनी लगायत आपालं यूरोपेली मुलुक थ्यंकाः पर्यटन मन्त्री स्वयमं नेपाल भ्रमण वर्ष सफल यायेगु लागिं थीथीकथं तयार नं याःगु खः । थ्व झ्वलय् चैतया निगूगु वालय् ख्वप महोत्सव न्यायेकेगुकथं ख्वप नगरपालिकां नं ब्यापक तयारी याःगु खः । तर पुस, माघ महिनां चीनय् खनेदुगु भाइरस अमेरिका, बेलायत, फ्रान्स जुजुं भारतवर्षय् दुहां वयाः आखिरय् नेपालय् नं फागुनया लिपांगु वालय् व चैत महिनाया सुरुं खने दयेवं नेपालय् चैत ११ गतेनिसें लकडाउन सुरु याये मालावन। भ्रमण वर्ष स्थगनया घोषणाा जुल । पर्यटन वर्षयात तःजिक हनाः नीगू लाख विदेशी पर्यटक दुकायेगु खँय् समर्थन यानाः थःगु हे कथं छुं प्रतिशत जक जूसां ख्वपय् हयेगु म्हगसः खंकाच्वंगु ख्वप नगरपालिका आशां द्यात ।

ख्वप नगरपालिका थम्हेस्यां हे पर्यटकपाखें दुहां वइगु लय् निगू करोड दां द्यापं फये माःगु खँ सार्वजनिक यानाच्वंगु दु। दकलय् मध्ये अप्वः आम्दानीया श्रोत जुयाच्वंगु पर्यटन सेवा केन्द्र सुख्खा जुयाच्वंगु दु ।

थौं ख्वप नगरपालिका थम्हेस्यां हे पर्यटकपाखें दुहां वइगु लय् निगू करोड दां द्यापं फये माःगु खँ सार्वजनिक यानाच्वंगु दु। दकलय्मध्ये अप्वः आम्दानीया श्रोत जुयाच्वंगु पर्यटन सेवा केन्द्र सुख्खा जुयाच्वंगु दु। अनया झिंप्यंगुलिं नाकाया कर्मचारीतय्त कोरोना भाइरसया बारे प्रचार याकेगु, आइसोलेशन ब्यवस्थापनय् ग्वाहालि यायेगुनिसें कयाः ख्वप अस्पताल, जनस्वास्थ्य केन्द्र व मेमेगुकथं जनताया सेवा सुविधा ब्यापक याकेगु ज्याय् जक छ्यलेमाःगु अवस्था ब्वलंगु दु। धायेत्यनागु खँ गुगु वर्ष सरकारं सन् २०२० यात नेपाल भ्रमण वर्ष घोषणा यानाः नीगू लाख पर्यटक हयेगु धकाः तयारी याःगु खः, उगु हे वर्षय् विश्वब्यापी रुपं खनेदुगु कोरोना भाइरसया प्रभावं पर्यटक सून्य जूगु दु। उकिं यानाः नेपालय् वइपिं पर्यटकत ला मवल मवल थन वयाच्वंपिं पर्यटकत तकं पिने वने माःगु अवस्था ब्वलन ।

गबलें गबलें विश्वय् बिचाः मयानागु लिच्वःत नं भोगे याये मालीगु जुयाच्वन । नेपालय् नं अज्याःगु विश्वब्यापी रुपं खने दइगु भोकमरी, आर्थिक मन्दी वा महामारीया बांमलाक प्रभाव लाः । थुगुसी अज्याःगु दुर्दशा झीसं फये मालाच्वंगु दु। विद्यार्थीत स्कुल वनाः आखः ब्वनेगु स्थिति मदु। स्कुल, कलेज चायेकेगु वातावरण ब्वलंके मफुत । गुलिं अनलाइन मार्फत् जूगु कक्षा नं दुग्यंक प्रभाव लाके मफुगु खनेदत । अथे जुया नं थौंकन्हय् शिक्षक व अभिभावकया दथुइ बेमेल सिर्जना जुयाच्वंगु दु। कक्षा अपडेट यायेगु कि मयायेगु धइगु अन्यौल ब्वलनाच्वंगु दु। एसइइ परीक्षा हे मजू तर जाँच बी म्वायेक हे पास यायेगु काइदा सरकारं पित बिउगु दु। थौं पर्यटन दिवसय् गाइड व पर्यटन व्यवसायीत वाल्ल च्वनेमाःगु स्थिति दु। मेगु इलय् जूसा ख्वप नगर दुहां वइम्ह न्हापांम्ह पर्यटकयात लसकुस यानाः थीथी कथं हनेज्या यानाः तःजिक थ्व दिवस हनीगु खः । तर ख्वप नगरय् थुगुसी गाइडतय्त सफाई ज्याय् छ्यलाः व पर्यटन सेवा केन्द्रया कर्मचारीत सीमित जक च्वनाः विश्व पर्यटन दिवस हनेज्या जूगु दु ।

विश्वब्यापी रुपं खनेदुगु नोबल कोरोना भाइरसया प्रभाव नेपालय् झन् झन् अप्वयाच्वंगु दु। उकिं नं भ्रमण वर्ष सम्भव मजुल । विश्व पर्यटन दिवस नं औपचारिकताय् सीमित जूवंगु दु। थथे स्वयेगु खःसा नेपाली उखान ‘आफू ताक्छु मुढो, बञ्चरो ताक्छ घुँडो’ धाःथें जूवंगु स्थिति दु। उकियात बिचाः यानाः झीसं छुं ई लिपा तःजिक नेपाल भ्रमण वर्ष यायेमाःगु अवस्था दु। छुं ई च्वनाः लिपा अथें क्वलनावनी धकाः अपेक्षा यानातःगु थुगु नोबल कोरोना भाइरसया प्रकोप मानवीय कारणं हे सिर्जना जूगु खः वा प्राकृतिक कारणं संसारय् खने दुगु खः धइगु वाः चायेकाः लिपा लिपा संसारयात सन्देश बीगु ज्याय् बैज्ञानिकत अध्ययन अनुसन्धानय् तल्लीन जुयाच्वंगु थ्व इलय् विश्वयात हे प्रभाव लाकीगु मेमेगु ल्वय्, युद्ध वा नाकाबन्दी थेंज्याःगु कारणं झीथाय् खने दइगु अन्यौलया वातावरण न्यून यायेत सरकार व राजनीतिक दलत सक्षम जुयाच्वनेमाः ।