रेशम चौधरी त्वःतेत माग

येँ (नेपालभाषा टाइम्स) – जनता समाजवादी पार्टी नेपालं नेता रेशम चौधरीयात त्वःतेमाःगु माग याःगु दु । पार्टीया निम्ह अध्यक्षपिं महन्थ ठाकुर व उपेन्द्र यादवं छगू विज्ञप्ति जारी यासें चौधरीयात याकनं त्वःते माःगु माग याःगु खः ।

थौंकन्हय् जेलय् तयातःम्ह जसपा नेपालया नेता चौधरी लगायत नेता कार्यकर्तायात सरकारं तयातःगु मुद्दा खारेज यानाः चौधरीयात तत्काल रिहाइ यायेमाःगु माग विज्ञप्तिइ यानातःगु दु । विज्ञप्तिइ मधेश थरुहट आन्दोलनय् ब्वति काःपिं छुं नेता व कार्यकर्तातय्त सरकारं मुद्दा चले यायेगु, सम्पत्ति रोक्का यायेगु व कुनेगु ज्या अझ नं जारी जुयाच्वंगु धासें उगु ज्या बन्द यायेत नं माग याःगु दु ।

२०७२ साल भदौ ७ गते मधेश–थरुहट आन्दोलनया झ्वलय् कैलालीया टिकापुरय् जनपथ प्रहरीया एसएसपी लक्ष्मण न्यौपाने लिसे च्याम्ह प्रहरी व छम्ह मचा सीगु खः । थुगु घटना लिपा सुरक्षाकर्मीया यातनां छम्ह थारु सीगु खः । सुरक्षाकर्मी सीधुंकाः ८५ स्वयां अप्वः थारुतय्गु छेँय् मि तयाबिउगु खःसा गुलिखे थारुत उगु थासं विस्थापित जूगु खः ।

घटनाय् मू द्वपं बियातःम्ह चौधरी २०७४ फागुन १४ गते जिल्ला अदालत कैलालीइ आत्मसमर्पण याःगु खःसा वयां लिपा चौधरीयात येँया डिल्लीबजार कारागारय् कुनातःगु खः । चौधरी वंगु निर्वाचनय् कैलाली १ पाखें निर्वाचित जूगु खःसा पुस १५ गते चौधरीं प्रतिनिधिसभा सांसदया रुपय् सपथ काःगु खः ।