लानिपुखूया देगलय् थौं गजू छुइगु

येँ (नेपालभाषा टाइम्स) – लानिपुखूया बालगोपालेश्वर देगलय् थौं गजू छुइत्यंगु दु। राष्ट्रिय पुनर्निर्माण प्राधिकरणया इन्जिनियर राजु मानन्धरं कनादीकथं थौं सुथय् ९ बजे अन गजू छुइगु ज्या जुइ । मलमासया कारणं तःजिगु पुजा मयासे क्षमा पुजा जक यानाः ज्याझ्वः क्वचायेकीगु खँ नं वय्कलं कनादिल । महाद्यःया पुजा सोमवाः जक याइगु जूगुलिं थौं गजू छुइगु ज्या यायेत्यंगु खः ।

लानिपूखुया बालगोपालेश्वर देगः न्हापा गुम्बज शैलीं दना तःगु खःसा ०७२ सालया तःभुखाय् लिपा थुकिया पुलांगु हे स्वरुपय् हयेत शिखर शैलीया देगः दनेगु ज्या जूगु खः । लानिपुखूया देगः बारे विवाद ब्वलनेवं येँ मनपां पुरातत्व विभागया पुलांम्ह महानिर्देशक विष्णुराज कार्कीया संयोजकत्वय् विज्ञ पुचः दयेकूगु खःसा उगु पुचलं ग्रन्थकुट शैलीं दनेमाःगु सिफारिस याःगु खः ।

प्रसियाया राजकुमार वाल्डेमरं सन् १८४५ फेब्रुअरी-मार्चपाखे नेपाः भ्रमण याःगु खःसा उगु इलय् वया नापं वःपिं चित्रकारतय्सं च्वयातःगु किपाय्ला निपुखूया देगः शिखर शैलीं दनातःगु खनेदुगु खः । उगु किपाय् खने दुगु देगः स्वयां आः दंगु देगः भचा चिजाः खनेदु। थुकियात कयाः मानन्धरं धयादिल, ‘थुकी खास पाःगु मदु, किपा व वास्तविकता दथुइ छुं छुं भिन्नता खनेदइ, देगः न्हापा गथे खः अथे दु ।’

भाजु मानन्धरया कथं वइगु छवाःया दुने पुनर्निर्माणया ज्या पूवंक क्वचाइ । वयां लिपा पुखुली न्या त्वःतेगु ज्या जुइ । मलमास क्वचायेवं पुखूया उलेज्या राष्ट्रपति विद्यादेवी भण्डारीं यानादीगु ग्वसाः दु। तःभुखाय् ब्वयेधुंकाः क्षति जूगु लानिपुखू दयेकेगु निंतिं २०७२ साल माघ २ गते राष्ट्रपति विद्यादेवी भण्डारीं शिलान्याश यानादीगु खः ।