ने. सं. ११४६ तछलागा तृतीया -

अमेरिकां लित हःगु बुद्ध मूर्ति प्रतिस्थापन

येँ (नेपालभाषा टाइम्स) – नेपालं खुया यंकाः अमेरिका थ्यंगु बुद्धया प्राचीन मूर्ति नेपाः हयाः प्रतिस्थापन याःगु दु । अमेरिकां लित हःगु शाक्यमुनि बुद्धया प्राचीन मूर्ति न्हुछेबहालय् प्रतिस्थापन याःगु खः । खुं खुया यंकाः अमेरिका थ्यंगु झिंस्वंगूगु शताब्दीया शाक्यमुनि बुद्धया प्रस्तर मूर्ति न्हुछेबहालय् विधिपूर्वक प्रतिस्थापन याःगु खः । उगु मूर्ति पुरातत्व विभाग, येँ महानगरपालिका, सम्पदा अभियन्तातय् मंकाः समन्वयय् हालय् जक बहालय् पुनःस्थापना याःगु खः ।

नेपालं खुया यंकूगु मूर्ति अमेरिकाय् लुइवं पुरातत्व विभागं अमेरिकास्थित तिब्बत हाउस कलेक्सनलिसे समन्वय यानाः नेपाः लित हयागु विभागया पुरातत्व अधिकृत सरिता सुवेदीं कनादिल । अमेरिकाया छगू संग्रहालयय् तयातःगु मूर्ति नेपाल सरकार, थीथी संघसंस्था, स्वदेशी व विदेशी सम्पदा अभियन्तातय् ग्वाहालि व सहकार्यय् नेपाः लित हःगु खः ।

अन्तर्राष्ट्रिय कानुनकथं गुगुं नं देय्या पुरातात्विक, सांस्कृतिक सम्पदा मेगु देशय् थ्यनाच्वंगु जुल धाःसा अज्याःगु अवस्थाय् माःगु कानुनी प्रक्रिया पूवंकाः सम्बन्धित देशय् तुं लित बीमाःगु व्यवस्था दुगुलिं वहे प्रक्रियाकथं उगु सम्पदा नेपाः लित हयागु विभागया अधिकृत सुवेदीं कनादिल ।

१३ गूगु शताब्दीइ निमौण जूगु माने यानातःगु शान्त व सौम्य भावया शाक्यमुनि बुद्धया प्रस्तर मूर्ति पुरातात्विक व सांस्कृतिक दृष्टिकोणं तसकं महत्वपूर्ण माने यानातःगु दु । लिसें थुकथंया सम्पदा उगु ईया कला, संस्कृति व मूर्तिकलाया उत्कृष्ट नमूनाया रुपय् नं कायेगु याना वयाच्वंगु दु ।

नेपालं खुया यंकूगु अज्याःगु बहुमूल्य सम्पदा, कलाकृति, वास्तुकला व मेमेगु धार्मिक, सांस्कृतिक, पुरातात्विक सम्पदा मेगु गुगुं नं देशय् दुगु सुचं प्राप्त जुइधुंकाः पुरातत्व विभागं कूटनीतिक माध्यमं उकियात लित हयेगु निंतिं माःगु प्रक्रिया न्ह्याकेगु याना वयाच्वंगु दु ।

थीथी देय्या संग्रहालय, निजी संग्रहालय वा संकलन, लिलामी छेँ आदि थासय् तयातःगु नेपाःया सम्पदा लित हयेबलय् सम्बन्धित देशं हे ढुवानी खर्च व्यहोरे यायेमाःगु व्यवस्था दु । सम्बन्धित देशय् नेपाःमि समुदाय व सम्पदा संरक्षणया अभियानय् क्रियाशील संघसंस्थां नं थुकी निरन्तर ग्वाहालि याना वयाच्वंगु वय्कलं कनादिल ।

स्वनिगलय् मध्यकालीन इलय् निर्माण जूगु थज्याःगु काष्ठकला, मूर्तिकला, प्रस्तरकला व वास्तुकला उगु ईया उत्कृष्ट नमूनाया रुपय् कायेगु यानातःगु दुसा थुकथं सम्पदा स्वनिगःया थीथी देग, चुक, ननि, बहालय् सुरक्षित तयातःगु दु ।