‘साल्ट ट्रेडिङ धरासायी यायेगु कुतः’

येँ – सरकारं देन्यंकं चि सहुलियत भावं थ्यंकेत साल्ट ट्रेडिङयात बियातःगु अनुदान ध्यबाया शेयरय् हिलेगु तयारी याःगु दु । मेखे थथे जुल धाःसा दुर्गम व विकट थासय् चि दंगु भावं थ्यंकेमफइगु खँ धाःगु दु । सरकारं अनुदानय् बिउगु ध्यबा शेयर हिलेगु यात धाःसा दुर्गम व विकट थासय् चिया भाः किलोया हे ७५–८० तका थ्यंवनीगु खँ धाःगु दु ।

सरकारं वि.सं. २०५३ साल निसें विकट थासय् चि ढुवानीया निंतिं अनुदान ध्यबा बिया वयाच्वंगु खः । आः अर्थमन्त्री डा. युवराज खतिवडां थ्व अनुदान ध्यबा बराबर साल्ट टे«डिङय् सरकारया शेयर थप याकेगु तयारी यानाच्वंगु खः । सरकारं ढुवानी अनुदान बियाच्वंगुलिं साल्ट ट्रेडिङ विकट झिंन्यागू जिल्लाय् चि किलोया गुतका ध्यबां मिया वयाच्वंगु खः ।

गृहसचिव प्रेमकुमार राईं ढुवानीया निंतिं अनुदान बिउगु ध्यबा हे शेयरय् परिणत यायेगु यात धाःसा थ्व हे ध्यबायात हानं ढुवानीइ छ्यलबलय् नीतिगत रुपं समस्या वइ धासें थथे जुल धाःसा विकटय् चि न्याये मफइ कथं थिके जुइगु खँ धयादिल । न्हापा आपूर्ति सचिव कथं ज्या यानादी धुंकूम्ह राई ढुवानीवापत बिउगु अनुदान ध्यबा छुं नं हालतय् सरकारया शेयरय् हिलेमजिउगु खँ धयादीगु दु ।

‘ढुवानीया निंतिं सरकारं बिउगु अनुदान शेयरय् हिल धाःसा आः चि ढुवानी यायेबलय् ढुवानी खर्च चिया भावय् हे थप जूवनी । अथे जुल धाःसा स्वाभाविक रुपं दुर्गम थासय् चिया भाः थहां वनी’ गृहसचिव राईं धयादीगु दु । सरकारं ढुवानीइ अनुदान मबिल धाःसा कर्णाली, डोल्पाय् प्रति किलो चिया भाः ६० तका व बझांगय् प्रति किलो चिया भाः ७५ तका थ्यनीगु खँ धाःगु दु ।

सरकारं २०५३÷५४ निसें २०७४÷७५ तक छगू अर्ब ६३ करोड १६ लाख ८ हजार तका दां ढुवानी अनुदान साल्ट ट्रेडिङयात बीधुंकूगु दु । अर्थ मन्त्रालयं उबलय् हे खर्च जुइधुंकूगु थ्व हे ध्यबायात शेयरय् हिलेगु तयारी यानाच्वंगु खः । सचिव राईं साल्ट ट्रेडिङयात थीथी दातृ निकायं गोदाम दयेकेत बिउगु ध्यबायात नं शेयरय् हिलेमजिउगु खँ धयादीगु दु ।

वय्कलं धयादीगु दु, ‘स्वीदँ न्ह्यः गोदामया निंति अनुदान काःगु ध्यबा आः वयाः शेयरय् परिणत यायेगु धायेगु खँ तसकं हास्यास्पद खः । यदि शेयरय् हिलेगु खःसा उबलय् सम्झौता याःबलय् हे छाय् थ्व खँ न्ह्यमथँगु । उबलय् अनुदान बीगु धायेगु आः वया शेयर खः धायेगु नीतिगत रुपं नं मिले मजूगु खँ खः ।’

साल्ट ट्रेडिङयात कृष विकास मन्त्रालयं नं किसानयात सुलभ भावं रासायनिक मलबीत दँय् स्वंगू लाख मेट्रिक टन साः न्यायेत अनुदान बिया वयाच्वंगु दु । अथेहे हुम्लाय् जाकि वितरणया निंतिं खाद्य संस्थानयात दँय् ५० करोड अनुदान बियाच्वंगु दु । थ्व हे अनुदानया कारणं खाद्य संस्थानं हुम्लाय् किलोया ६० तकां जाकि मियाच्वंगु दु ।

अर्थ मन्त्रालयं धाःकथं थथे ढुवानीया निंतिं बिउगु ध्यबा शेयरय् हिलेगु खःसा हुम्लाय् जाकि किलोया निसः तका थ्यनीगु खँ धाःगु दु । अथेहे साःया निंतिं बियातःगु अनुदानया कारणं किसानतय्सं छब्वरा युरिया साः झिंन्यासः तकां दंक न्याये खनाच्वंगु दु । मखुसा युरिया साः छब्वराया निद्वः व निसः तका थ्यनी ।

पुलांम्ह वाणिज्य सचिव पुरुषोत्तम ओझां नं दुर्गमय् लानाच्वंपिं व लक्षित जनतायात सुलभ व दंगु भावं सामान बीगु निंतिं हे अनुदान बिया वयाच्वंगु धासें थज्याःगु ध्यबा शेयर हिले मजिउ धयादीगु दु । पुलांम्ह सचिव ओझां ३५ दँ न्ह्यः दातृ निकायपाखें गोदाम दयेकेत धकाः वस्तु अनुदान अन्तर्गत बिउगु गोदम बराबरया ध्यबा नं शेयरय् परिणत यायेमजिउगु खँ धयादीगु दु ।

उबलय् जूगु सम्झौता बमोजिम जक यायेमाः धयादिसें वय्कलं धयादीगु दु, ‘उबलय् कायेबलय् छगू कथं सम्झौता यायेगु आः वया सम्झौता अःखः ज्या याये दइमखु ।’‘दातृनिकाय पाखें अनुदान कथं वःगु गोदाम, उपकरण व मेसिनरी सामानयात शेयरय् हिलेगु धयागु खँ तत्कालिन सम्झौताय् न्ह्यथनातःगु खनेमदु ।

सम्झौताया सर्त अःखः शेयरय् हिल धाःसा साल्ट ट्रेडिङया अवस्था नं नेशनल ट्रेडिङ थें हे धरासायी जुइ, थुकिया जिम्मेवारी सुना कायेगु’ वय्कलं धयादीगु दु ।साल्ट ट्रेडिङ निजी ख्यः व सरकारया शेयर दुगु कम्पनी खः । थीथी व्यापार याइगु सरकारया संस्थानत धरासायी जुयाच्वंगु इलय् आः साल्ट ट्रेडिङयात नं धरासायी यायेगु निंतिं अनुदान ध्यबा नं सरकारया शेयरय् हिलेमाः धकाः खँ पिहां वयाच्वंगु खँ पुलांम्ह सचिव ओझां धयादीगु दु ।