नामसंगीतियात आर्थिक ग्वाहालि

यल- यल महानगरपालिका वडा नं. १६ पाखें नामसंगीति पर्वया निंतिं आर्थिक ग्वाहालि याःगु दु । १६ वडापाखें नामसंगीति पर्वया निरन्तरताया निंतिं न्यागू लख तका दां आर्थिक ग्वाहालिकथं चेक लःल्हाःगु खः ।

थनया नकबहीस्थित फल्चाय् नामसंगीति पाठ यायेगु ज्यालिसें १६ वडाअध्यक्ष निर्मलरत्न शाक्यं परम्परागत बौद्ध धर्म संघयात न्यागू लख तका दांया चेक लःल्हानादीगु खः । आर्थिक ग्वाहालि लःल्हासें वडाअध्यक्ष शाक्यं स्वनिगःया नेवाः बौद्ध समुदाय दुने आर्य मञ्जुश्री नामसंगीति पाठ यायेगु छगू परम्परागत व अमूर्त बौद्ध संस्कृतिया रुपय् दयाच्वंगु धासें उकिया संरक्षण व निरन्तरताया निंतिं वडापाखें ग्वाहालि यानागु खँ कनादिल ।

थःगु वडापाखें संस्कृति, सम्पदाया संरक्षण यायेगु खँय् प्राथमिकता बिया वयाच्वनागु खँ न्ह्यथनादिसें स्थानीयवासी सलंसः दँ न्ह्यवनिसें संरक्षण याना वयाच्वगु थुकथंया अमूर्त संस्कृति संरक्षण यायेगु नापं प्रोत्साहन बिया वनेमाःगु खँय् बः बियादिल ।

आर्थिक ग्वाहालि लःल्हानाकासें संघया महासचिव दिनेश शाक्यं दँय्दसं यलय् संचालन जुइगु नामसंगीति पर्वया निंतिं अक्षय कोष स्थापना यानाः उकिया ब्याजपाखें पर्व संचालन यायेगु जानकारी बियादिल ।