सम्बन्धित पक्षं वाः चायेके माः !

हालय् नेपाःया झण्डा च्याकूगु विषय बजारय् भाइरल जुयाच्वंगु दु। झण्डा छ्वयेकूगु घटनाया पक्ष, विपक्षय् तीव्र मतत पिहां वयाच्वंगु दु। झण्डा च्याकूगु विषयया विपक्षय् नवाइपिंसं झण्डा छ्वयेकेगु राष्ट्रघाती ज्या खः, थुमित हदतकया सजाय बीमाः, त्वःते मजिउ। सः थ्वयेकी । तर राजनीतिक विश्लेषक प्रा. डा. सुरेन्द्र के.सी. थेंज्याःपिं बुद्धिजिवीतसें स्पष्ट याइ झण्डा छ्वयेकूगु घटनायात कयाः अनावश्यक हल्ला यायेगु स्वयां छाय् छ्वयेकल धइगु खँय् गम्भिर जुयाः समस्याया विवेकपूर्ण धंगं संबोधन यायेमाः । छाय् छ्वयेकल ? उकिया औचित्यपाखे चिउताः मतसे मात्र झण्डा छ्वयेकूगु खँयात ल्ह्वनाः जनताय् वैमनस्यता न्यंकेत स्वयेगु प्रत्युत्पादक जुइ ।

डा. सुरेन्द्र केसीं खुलासा याइ, देशय् दयाच्वंगु जातीय विभेद, दमन, शोषण, हेलां थंगु पीडित पक्षया आक्रोश, असन्तुष्टिया अभिव्यक्ति खः झण्डा जलनया प्रकरण । देशय् निश्चित जाति, हर क्षेत्रय् हावी जुयाच्वंगु दु। देय् नश्लवादी राष्ट्रवादं त्वपुयाच्वंगु दु। शासन, सत्ता निश्चित जाति समूहया घेरा दुने लानाच्वंगु दु। थज्याःगु विद्यमान जातीय हैकमवादया विरोधय् पीडित पक्षं थःगु समानता, हक अधिकारया निंतिं आक्रोश व्यक्त यायेत बाध्य जूगु खः । जातीय विभेदया अन्त्य यानाः देशवासीया सकसितं समान अवसर बियाः स्वविकास यायेगु अवसर सृजना यायेमाः । अन्यथा देशय् जातीय संघर्षं विकराल रुप काइ । विश्लेषक के.सीं. थःगु विश्लेषणय् प्रष्ट याइ ।

झण्डा छ्वयेकूगु प्रकरणयात कयाः उकिया उद्देश्ययात मनन मयासे आम जनताय् अनावश्यक उत्तेजना थनाः जनतायात गलत लँय् यंकेत स्वये मजिउ । देय्या झण्डा देय्न्यंकंया झण्डा जुइत व झण्डा क्वय् सकल जनता समान रुपं न्ह्यनेमाः । निश्चित पुचलं जक झण्डायात थःगु यानाः घय्पुया तइबलय् झण्डां पिने लाःपिंसं झण्डायात संकीर्णवादीतय्सं दुरुपयोग याःगु तायेकी । झण्डा समावेशी जुइमाःगु सः थ्वयेकी । उकिं देशय् निश्चित संकीर्णवादीतसें झण्डायात याःगु दुरुपयोग दुरुपयोगया विरोध खः झण्डा प्रकरण झण्डायात सकसिनं अपनत्वया अनुभूति बीगु जातीय समानता, स्वाभिमान देशय् ब्वलंकेमाः । देय् झण्डाप्रति सम्पूर्ण जनतायात स्वतः सम्मान दइ । थन झण्डाया खँ मखु। झण्डायात सम्पूर्ण देय् जनता सकलया प्रतीककथं छ्यलेत मस्वःपिनि संकीर्ण प्रवृत्तिया घोर भत्र्सना जुयाच्वंगु दु। पीडित पक्षयात देशद्रोही, राष्ट्रघाती, अपराधी धकाः क्यत्यलां समस्याया सही हल जुइमखु। विभेद, शोषण, पक्षपातया स्थितिं गबलय्तक निरन्तरता कयाच्वनी । देशय् पीडित पक्षं थःगु हक अधिकारया निंतिं संघर्ष यानाच्वनी । उकिं सत्ता शासनय् च्वंपिंसं सही समस्या छु खः, सीकाः जायज समस्या समाधान यायेमाः । अन्यथा देशय् अशान्ति, अमन चैन दइमखु। यक्व बुद्धिजीवीतय्सं झण्डा प्रकरणयात कयाः थज्याःगु विचाः प्वंकूगु दु ।

प्रधानमन्त्रीजुं थःगु बुदिं नेपाःया नक्साया केकयात कुचा कुचा थलाः न्यायेकल । झण्डा छ्वयेकेगु आपराधिक ज्या खःसा नक्साया केक दयेकाः कुचा कुचा थलेगु नं जायज मखु ।

खतुं झण्डा प्रकरणं अनेक तर्कवितर्क नं थना हल । प्रधानमन्त्रीजुं थःगु बुदिं नेपाःया नक्साया केकयात कुचा कुचा थलाः न्यायेकल । झण्डा छ्वयेकेगु आपराधिक ज्या खःसा नक्साया केक दयेकाः कुचा कुचा थलेगु नं जायज मखु। गुम्हेसितं ‘ऐन’ गुम्हेसितं ‘चैन’ । थथे जुइ मजिल । सः थ्वयेकीपिं नं दु। मखु प्रधानमन्त्रीया बुदिंबलय् स्यंकूगु नक्साया केक पुलांगु नेपाःया नक्सा खः, न्हूगु चुच्चे नक्सा मखु, प्रधानमन्त्रीया बचाउ याइपिं नं खनेदइ । हाकनं हालय् धरानय् सार्वजनिक लँय् नेपाःया नक्सा च्वयातःगु। शायद कलाकारं किउगु जुइमाः। बांलाः । तर नक्साय् न्हुत्तुन्हुयाः मनूत वये वनेगु यानाच्वनी । थथे लँय् नक्सायात मनूतय्सं न्हत्तुन्हुयाः वनेगु अशोभनीय मखुला ? मनूतय्सं न्ह्यसः थना हइ । सरकारं थुखेर छाय् चिउताः मतल ?

छगू तर्क खनेदइ । शिक्षकतय्सं कक्षाय् ब्वंकीबलय् बोर्डय् नेपाःया झण्डा, देय्या नक्सा च्वइ, डस्टरं हुइ । आः छु शिक्षकतय्त देशद्रोही घाये जी ला ? मखु। गन झण्डा दयेकेगु, हुइगुया थःगु हे सन्दर्भ दइ । सन्दर्भ थ्व कार्य थन आपराधिक जुइमखु। उकिं छु यात ? छाय् यात ? उकिया सन्दर्भया नं विचाः यायेमाः। झण्डा छ्वयेकूपिंत सजाय बीगु ऐनय् व्यवस्था दु। झण्डा छ्वयेकूपिंत कडा से कडा सजाय बियां ल्वय्या उपचार जुइला ? मूल खँ ल्वय्या जुइ । राष्ट्रिता धइगु भूगोल जक मखु। मन, आत्मियता खँ जुइ । देशवासीतय् दथुइ जब मन छधी जुइ, आत्मियता सबल जुइ, राष्ट्रियता थुइ । मजबूत जुइ । उकिं देय्या जनताया नुगलय् राष्ट्रियता सबल यायेत सुयातं ‘काखा’ सुयातं ‘पाखा’ याये मजिउ । प्रसिद्ध मानवशास्त्री दोरबहादुर विष्ट, विद्वान खगेन्द्र संग्रौला, डा. युग पाठक, डा. निलाम्बर शर्मापिंसं नं देशय् जुयाच्वंगु जातीय विभेद, शोषण, दमन बारे इलय् व्यलय् विचाः प्वंकू । विवेकशील, उच्च जातियापिंसं नं देशय् दयाच्वंगु निश्चित उच्च जातिया हैकमवादया विरोध याः।

जातीय वैमनस्यता देय्, राष्ट्रया निंतिं हानिकारक जुइ । देय् दुने भातृत्वभाव अनिवार्य जुइ । तर देशय् सकलयात समान मखंकेगु नं अराष्ट्रिय खः । जुइ । सम्बन्धित पक्षं वाः चायेकेमाः ।