भुखाय् पीडितयात सहुलियत ब्याजं त्यासा
येँ – भुखाय् पीडित जनतायात सरकारं सहुलियतपूर्ण ब्याजदरं त्यासा बीगु जूगु दु । सोमवाः पुनर्निर्माण प्राधिकरणया कार्यकारी अधिकृत सुशील ज्ञवालीया अध्यक्षताय् च्वंगु सहलहय् त्यासा काये चाहे जूपिंत प्रक्रिया पूवंकाः अःपुक त्यासा बीगु समझदारी जूगु खः । नकतिनि जक मन्त्रिपरिषदं पारित याःगु सहुलियतपूर्ण त्यासाया निंतिं ब्याज अनुदान बीगु कार्यविधि पारित याःगु खः ।
न्हूगु कार्यविधि कथं निजी छेँ दयेकेगु सम्झौता याःगु तर ध्यबाया कारणं आः तक छेँ दयेकेगु ज्या धाःसा न्ह्याके मफुपिं लाभग्राहीतय्सं आः दयेकेगु छेँ बरः तयाः स्वंगू लाख तका तका त्यासा कायेफइगु खँ धाःगु दु । म्हिगः जूगु सलहल ज्याझ्वलय् नेपाल बैंकर्स एसोसियसनया अध्यक्ष ज्ञानेन्द्रप्रसाद ढुंगाना, नेपाल फाइनान्सियल इन्स्टिच्युशन एसोसिएसनया अध्यक्ष सरोजकाजी तुलाधर, डेभलपमेन्ट बैंकर्स एसोसिएसनया दुजः मनोज ज्ञवालीपिंसं न्हूगु कार्यविधि कथं त्यासा बीत बैंकतय्त छुं समस्या मदुगु खँ धाःगु खः ।
अर्थ मन्त्रालयया सहसचिव उत्तरबहादुर खत्रीं आर्थिक अभावया कारण छेँ दने मफुपिंत राहत जुइ कथं सरकारं न्यागू प्रतिशत ब्याज अनुदान बीकथं थज्याःगु त्यासा योजना हयागु जानकारी बियादिल । थज्याःगु त्यासाय् बैंकया बेस रेट सिबें निगू प्रतिशतं अप्वः मजुइक ब्याज काये फइगु खँ धाःगु दु । तर मेगु छुं नं कथंया सेवा शुल्क धाःसा काये मदइगु खँ प्राधिकरणं धाःगु दु ।
थ्वहे झ्वलय् प्राधिकरणं छगू सुचं जारी यासें भुखाचं क्षति जूगु छेँ बाहेक उगु हे थासय् वा देय्न्यंकं गनं नं च्वने जिउगु छेँ दुपिंसं मखुगु विवरण भरे यानाः अनुदान काःपिंत उगु ध्यबा लित बीत इनाप याःगु दु । यदि अज्याःगु ध्यबा लित मबिल धाःसा सरकारी बाँकी सरह असुल उपर यायेगु खँ धाःगु दु ।
अथेहे स्वथाय् प्यथाय् छेँ दुपिंसं नं छथाय् स्वयां अप्वः थासय् भुखाचं पीडित अनुदान कयातःगु दुसा अज्याःगु ध्यबा नं लित बीगु धाःगु दु । यदि छगू स्वयां अप्वः थासय् ध्यबा बुझे यानातःगु प्रमाणित जुल धाःसा सरकारी बाँकी सरह असुल उपर यायेगु ख्याच्वः नं प्राधिकरण बिउगु दु । थ्व निगुलिं कथंया ध्यबा स्वलाया दुने सम्बन्धित जिल्ला जिल्ला आयोजना कार्यान्वयन इकाईलय् बुझे यायेत नं प्राधिकरणं इनाप याःगु दु ।
LEAVE YOUR COMMENTS