साहित्यकार अपर्णा प्रधानया प्यंगू सफू पिदन

येँ – समालोचक, बाखं च्वमिलिसें निबन्धकार मय्जु अपर्णा प्रधानया प्यंगूसफू छगू हे ज्याझ्वलय् पितब्वज्या जूगु दु । साहित्यकार प्रधानया नेपालभाषाया निगू, खय् भाय् व अंग्रेजी भाय्या छगू छगू सफू पितब्वज्या जूगु खः ।

साहित्यकार प्रधानया नेवाः भाय्या ‘जि भमचा कतांमरि’, व ‘झीगु साहित्यय् मथुरा साय्मि’ खय् भाय्या ‘म र मेरो समय’ व अंग्रेजी भाय्या ‘टाइम अफ माइ लाइफ) सफू छसिकथं वाङ्मय शताब्दीपुरुष सत्यमोहन जोशी, नेपालभाषा एकेदमिया भाइस चान्सलर यज्ञरत्न धाख्वा, कृष्णलाल प्रधान व नेपाल साहित्य मन्दिरया नायः तिलकप्रकाश कायस्थं मंकाःकथं पितब्वज्या यानादीगु खः ।

पितब्वज्या जूगु सफूमध्ये साहित्यकार ईश्वरीमैयाँ श्रेष्ठं खय् भाय्या व संचारकःमि सिल्भिया राजोपाध्यायं अंग्रेजीं सफूया भाय् हिलादीगु खः ।ज्याझ्वलय् नवासें मूपाहां जोशीं नेपालभाषाया साहित्ययात अंग्रेजी भासं भाय् हिलाः विश्वव्यापीकरण याना यंकेमाःगु खँय् बः बियादिल ।

लिसें वय्कलं ज्याथगु उमेरय् तकं च्वयेगु जक मखसे सफू हे पिथनेगु ज्याय् सक्रियता क्यनादीगु धासें साहित्यकार प्रधानया साहित्य व च्वयेगु प्रतिया लगावयात कयाः च्वछायादिल । साहित्यकार हितकरवीर सिंह कंसाकारं साहित्यकार प्रधानया च्वज्याय् हःपाः बीगुलिइ वय्कःया जहानया तःधंगु ल्हाः दुगु खँ कुलादिल ।

ज्याझ्वलय् समालोचक पूर्ण ताम्राकार, आख्यानकार मथुरा साय्मि, डा. सुन्दरकृष्ण जोशी लगायतं पितब्वज्या जूगु सफूयात कयाः नुगःखँ तयादीगु खः । कुतः पिकाकःया ग्वसालय् जूगु ज्याझ्वलय् विमल ताम्राकारं लसकुस यानादीगु खः ।