प्राकृतिक पर्यटकीउ नगरीइ नेवाः संग्रहालय

प्राकृतिक सौन्दर्यतां जाःगु विश्वया हे आकर्षक पर्यटकीय गन्तव्य पोखराय् मेगु छगू सांस्कृतिक गन्तव्य थप जुइगु जूगु दु । तालया तल, हिमश्रृंखला, गुफा लगायत प्राकृतिक सम्पदां जाःगु सहरय् आः नेवाः परम्परा व संस्कृतिया अध्ययन अवलोकनया निंतिं ‘नेवाः सांस्कृतिक संग्रहालय’ चायेकेगु कुतः न्ह्याःगु दु ।

नेवाः संस्कृति व जीवनशैलीलिसें जन्मनिसें कयाः मृत्युतकया संस्कारय् छ्यलीगु हलंज्वलंया बारे लिपांगु पुस्तायात ज्ञान बीगु व पर्यटकीय आकर्षणया केन्द्रया रुपय् विकास यायेगु लक्ष्यलिसें संग्रहालय स्थापना याःगु खः ।

नेवाः खलः, कास्कीं नेवाः संस्कृतियात जीवन्त याना तयेगु नापं पर्यटकीय गन्तव्यया रुपय् विकास यायेगु उद्देश्यं पोखरा महानगरपालिका ३ नदीपुरय् दयेकाच्वंगु संग्रहालय सम्पन्न जूगुयालिसें थ्व पोखरा पर्यटनया मेगु आकर्षणया केन्द्र विन्दु व महत्वपूर्ण गन्तव्य जुइगु विश्वास याःगु दु ।

भिमसेन द्वादश गुथिया थ्यंमथ्यं स्वपी जग्गाय् दयेकातःगु आकर्षक नेवाः छेँया स्वतँ जालय् संग्रहालय स्थापना याःगु दु । नेवाः खलः कास्कीया अध्यक्ष अशोक पालिखें संग्रहालय वइगु खुलाया दुने पूर्ण रुपं निर्माण सम्पन्न यानाः सर्वसाधारणया निंतिं खुल्ला यायेगु जानकारी बियादिल ।

संग्रहालयय् नेवाः परम्परा व संस्कृति पिज्वइकथंया पुलांगु बसजाः ज्वलं, थीथी कथंया हलंज्वलं दुगु व लिपा बुलुहुं थप यायां यंकेगु जानकारी वय्कलं बियादिल । संग्रहालयय् २३६ दँ पुलांगु पाथी नं स्वये खनी । अथे हे ६ फिट तजाःगु त्वाःदेवा नं तयातःगु दुसा थुकथं हे २०९ दँ न्ह्यःया घः नं संग्रहालयय् तयातःगु दु ।

संग्रहालय दुने तायमचा, झिंनिम्ह भैरवया प्याखं लगायत नेवाः कर्मकान्डया बारे सकतां कथंया श्रव्यदृश्य ज्वलंत तकं तयाः नेवाः संस्कार, संस्कृतिया अध्ययेता, पर्यटकयात अवलोकन याकेगु लक्ष्य कयागु पालिखें जानकारी बियादिल । स्वतँ जाःगु छेँइात कलात्मक धंगं निर्माण यानातःगु दु । ख्वपं हःगु करिब २०० दँ पुलांगु झ्याः, लुखा नेवाः छेँ भवनय् प्रयोग यानातःगु दु ।

पालिखेया कथं हातकया दुने भवनया निंतिं न्हय्गू करोड तका स्वयां अप्वः खर्च जुइधुंकूगु दुसा ल्यं दुगु ज्या क्वचायेकेया निंतिं थप निगू करोड तका तुइ ।निर्माण ज्या सिधयेकाः पर्यटकयात निश्चित शुल्क कयाः अवलोकन याकेगु व्यवस्था नं यायेगु वय्कःया धापू दु ।

’जनजातिया संस्कृति नं पर्यटनया महत्वपूर्ण आकर्षण खः, संग्रहालपाखें म्होतिं नं पोखराय् पर्यटकत प्यघौ स्वयां अप्वः ई च्वनीगु विश्वास यानागु दु’, वय्कलं धयादिल । गण्डकी प्रदेश सरकारया आन्तरिक भ्रमण वर्ष २०१९, संघीय सरकारपाखें घोषित ‘भिजिट नेपाल २०२०’या लिसें प्रदेश सरकारया सन् २०२२ य् २० लाख पर्यटक दुकायेगु लक्ष्य प्राप्तिया योजनायात संग्रहालयं नं ग्वाहालि याइगु विश्वास याःगु दु ।

गण्डकी प्रदेशया उद्योग, पर्यटन व वातावरणमन्त्री विकास लम्सालं जातजातिया संस्कृतिया अध्ययन व अवलोकन याये फइगु थुकथंया पूर्वाधारपाखें पर्यटकं थःगु बसाइ ताःहाकः यायेत ग्वाहालि जुइ धयादिल ।

प्रदेश सरकारं समृद्धिया मुख्य आधारया रुपय् पर्यटनयात काःगु व संस्कृति, प्रकृति व साहसिक पर्यटनया माध्यमं प्रदेशया समृद्धि हासिल यायेगु जुइ धासें वय्कलं धयादिल, ‘झीपिं संस्कृतिइ तःमि धकाः धायेगु यानाच्वना तर झीसं झीगु जातजातिया संस्कृतिया संरक्षण याये फयाच्वंगु मदु, थुकियात ल्यंकेमाःगु अतिकं आवश्यक जू ।’

नेवाः संस्कृतियात ल्यंकेमाःगु आवश्यक जूगु धासें वय्कलं थ्व देय्या हे महत्वपूर्ण सम्पत्ति जूगु खँ न्ह्यथनादिल । मन्त्री लम्सालं सरकारं नवलपुरय् थारु, म्याग्दी वा बाग्लुङय् मगः, पोखराय् नेवाः, लमजुङय् गुरुङ लगायत ११ गुलिं जिल्लाय् फरक फरक जातिया सांस्कृतिक संग्रहालय दयेकेगु योजना तयागु जानकारी बियादिल ।

संग्रहालय निर्माणय् आतक नेपाल पर्यटन बोर्ड पोखरां ८५ गू लाख लगानी यायेधुंकूगु दु । प्राकृतिक सम्पदाय् थानाच्वंगु पोखराया पर्यटनयात थप विस्तार याना यंकाः न्हू न्हूगु गन्तव्य मालेगु ज्या जुयाच्वंगु वास्तविकताय् नेवाः संग्रहालय महत्वपूर्ण जुइगु विश्वास कयागु बोर्डया प्रबन्धक निर्देशक सूर्य थपलियां कनादिल ।

नेपाःया बाइसे चौबिसे राज्यया पालंनिसें हे पोखराया इतिहास चर्चाय् दुगु धासें वय्कलं धयादिल, ‘प्रकृति व संस्कृतिं जाःगु थ्व सहरय् नेवाः जाति ताःई न्ह्यःनिसें हे च्वना वयाच्वंगु येँ, यल, ख्वपय् थें इमिगु गरिमामाय इतिहास कायम दुगुलिं निर्माणाधीन संग्रहालयं थनया सांस्कृतिक पर्यटनय् विशिष्ट योगदान बी ।’

संस्कृतिविद् तीर्थ श्रेष्ठया कथं कास्कीया तत्कालीन जुजु सिद्धिनारायण शाहं वि.सं. १८३५ य् ख्वपं २६ म्ह नेवाःयात हयाः पोखराय् तःगु खः । उगु इलंनिसें हे संगठित रुपय् नेवाः समुदायया पोखराय् बस्ती विकास शुरु जूगुयालिसें इमिसं थन हे बन्द व्यापार शुरु याःगु जानकारी वय्कलं बियादिल । वि.सं. २०२० तक नं पोखराया मुख्य चोक व बजारय् नेवाः समुदाय हे व्यापारय् सहभागि जुया वयाच्वंगु श्रेष्ठया धापू दु ।

सम्बन्धित बुखँ

LEAVE YOUR COMMENTS