खरिपाटीइ नं अजूचायापुगु दिनचर्या

येँ – चीनया कोरोनाग्रस्त शहर वुहानं ‘उद्धार’ यानाः नेपाः हःपिं १७५ म्ह नेपाःमित थःगु देशय् ला याउँक थ्यन, तर उमित क्वारेन्टाइनया रुपय् तयातःगु ख्वपया खरिपाटीस्थित नेपाल विद्युत प्राधिकरणया तालिम केन्द्रय् धाःसा उपिं अजूचायापुगु दिनचर्याय् म्वानाच्वंगु खँ सीदुगु दु ।

अन तयातःपिं १७५ म्हं नेपाःमितय्त अतिकं कडा नियम दुने तयाः स्वास्थ्य परीक्षण यानाच्वंगु दु । अन १३४ म्ह मिजं व ४१ म्ह मिसापिंत अलग्ग अलग्ग क्वथाय् तयातःगु दु । गुलिं क्वथाय् निगू बेड दुसा गुलिं क्वथाय् स्वंगू बेड नं दु । उपिं च्वनाच्वंगु थासय् सुं नं न्ह्यःने वनी मखु । न्ह्यागु ज्या यायेत नं उमित माइकं एनाउन्समेन्ट यानाः निर्देशन बिया हइ ।

उमित नयेगु थासय् नं सुं न्ह्यःने वनी मखु । नयेगु ई त्यल धकाः माइकं धया हइ । अले नयातःगु थासय् वनाः नसा काः वनी । अन उमिगु लागिं प्याक् यानातःगु खाना तयातःगु दइ । थः थः वनाः काः वनेगु खः । अज्याःगु नसा कायेगु लागिं स्वंगू अलग अलग ब्लकया व्यवस्था यानातःगु दु । न्हिं प्यक्वः खाना नकेगु व्यवस्था यानातःगुलिं अन च्वंपिं सकलें धाःसा लय्ताः । थुकियात उमिसं सरकारं याःगु बांलाःगु व्यवस्था धकाः तारिफ याःगु दु ।

छेँजःपिंत प्रत्यक्ष नापलाये मखंसां फोनं धाःसा परिवारलिसे खँ जुयाच्वंगु दु । उमित अलग्ग फोन बियातःगु मदु । थःथःगु हे मोबाइलं खँ ल्हायेमाः । सरकारं उमित नेपाः लित हयेगु जुल धकाः धाःसां नं स्ववाः तक लित महःगु कारणं छेँजःपिं स्वास्थ्य मन्त्रा–लयय् वनाः ल्वाः वंगु खः ।

अन तयातःपिं नेपाःमितय्त १४ न्हु तक अलग्ग तये माःगु व यदि थ्वया दथुइ सुयातं संक्रमण खने दत धाःसा वयात पाटन अस्पताल यंकाः वासः याकेगु जुइ धयातःगु दु ।