
येँ- आसामया नेवाःतय्त नं आः अनया आदिवासी जनजाति धलखय् दुथ्याकेगु निंतिं तयारी जुयाच्वंगु दु । अनया नेवाःतय्सं थःपिंसं नेवाः भाषा, सस्कृति, संस्कार व लिपि मसःगुलिं यानाः आदिवासी जनजातिया धलखय् दुथ्याके मफुगु खँ धाःगु दु ।
थःपिंत आदिवासी जनजाति धलखय् दुथ्याके मफयेवं अन सरकार पाखें वइगु थीथी कथंया सुविधां थःपिं बञ्चित जुइ मालाच्वंगु खँ नं धाःगु खः । उकिं आः उपिं नेवाः भाय् सयेकेगु लिसें संस्कार, सस्कृति व लिपि सयेकेत तयारी यानाच्वंगु दु ।
अन आदिवासी जनजातिया धलखय् दुमथ्याःगुलिं यानाः चुनावया इलय् मतदान यायेगु अवसर दुसां नं उम्मेदवार जुइगु अवसरं धाःसा बञ्चित जुइ मालाच्वंगु खँ नं धाःगु दु । आसामया नेवाःतय् भासं धायेगु खःसा ‘दिन पाइन्छ, लिन पाइँदैन’ जुयाच्वंगु दु ।
आसामय् च्वंपिं थीथी झिंछगू जातियात आदिवासीया धलखय् दुथ्याकेधुंकूगु दु । आदिवासी प्रमाणित जूगुलिं उमित सरकारपाखें थीथी कथंया सुविधा बीगु यानाच्वंगु खँ नं अनया नेवाःतय्सं धाःगु दु ।
थःपिनि भाषा मदयाः आसामया नेवाःतय्सं भाषा संस्कृति सयेकेगु गन धकाः तकं मसियाच्वंगु खः । थ्वहे झ्वलय् उमिसं अल इण्डिया नेवार संगठनया महासचिव एसपी प्रधानयात स्वापू तल । प्रधानं थुकिया लागिं नेपाःया संस्कृतिविद् गणेशराम लाछियात स्वापू तयेका बिउगु जुयाच्वन ।
थ्वयां लिपा भाजु लाछिया हे नेतृत्वय् आसाम वंगु छगू पुचलं फागुन २७ गते अन जूगु न्हापांगु नेवाः सम्मेलनय् ब्वति कयाः नेवाःतय् थःगु हे भाषा, लिपि, संस्कृति संस्कार, नसात्वँसा, भेषभुषा, बाजं आदि अन प्रदर्शन यायेगु ज्या जूगु खः ।
उगु प्रदर्शनया अवलोकन यायेत आसाम राज्यया प्रतिनिधि वःगु खःसा उगु प्रतिनिधि मण्डलयात भाजु लाछिं हे नेवाः जाति व नेवाःतय् कला संस्कृति बारे जानकारी याकादीगु खः । थ्व प्रदर्शन लिपा आः अनया नेवाःतय्त नं आदिवासीया धलखय् दुथ्याकेगु पहल शुरु जूगु खः ।
LEAVE YOUR COMMENTS