छुं वाः लिपा हे खोप वइगु ट्रम्पया दावी
एजेन्सी – अमेरिकी राष्ट्रपति डोनाल्ड ट्रम्पं वइगु छुं वाः दुने हे कोरोना विरुद्धया खोप आम जनताया निंतिं पिहां वइगु दावी यानादीगु दु। तर वय्कःया थ्व दावी धाःसा अमेरिकाया वासः नियमन याइगु संस्थाया धापू स्वयां अःखः जुयाच्वंगु दु ।
अमेरिकाय् वासःया नियमन याइगु संस्था सेन्टर्स फर डिजिज कन्ट्रोल एन्ड प्रिभेन्सनया निर्देशक रोबर्ट रेडफिल्डं धाःसा सन् २०२१या मध्य पाखे जक आम नागरिकतय् निंतिं वासः उपलब्ध जुइगु खँ धाःगु दु ।
वय्कलं कोरोनाविरुद्धया खोपया सुरुवाती चरण धाःसा थ्व दँया नोवेम्भर वा डिसेम्बरपाखे वइगु खँ धयादीगु दु। तर थ्व इलय् सीमित मात्राय् जक खोपया आपूर्ति जुइगुलिं प्राथमिकताय् लाःपिंत जक खोप बीगु खँ वय् कलं धयादीगु दु ।
वय्कलं धयादीगु दु, ‘यदि छिं आमरुपं अमेरिकी नागरिकतय्त गुबलय् खोप वइ धकाः न्यन धाःसा जितः ताः सन्२०२१ या जून निसें सेप्टेम्बरय् तकया दुने जक वइ जुइ ।’
तर राष्ट्रपति ट्रम्पं धाःसा सिडिसीया निर्देशकं शायद गल्ती यानादिल जुइ वा द्विविधाय् लानाः धाःगु जुइ धयादीगु दु । ट्रम्पं धयादीगु दु, ‘सिडिसीया निर्देशकं न्ह्यागु धाःसा गलत धाःगु खः । झी तःधंगु ल्याखय् मनूतय्त खोप उपलब्ध यायेत तयार जुइत्यनागु दु। थ्व लिपा अमेरिकां पिने नं वनी, छाय् कि मेमेगु देय्यात नं ग्वाहालि यायेत्यनागु दु।’
मेखे डेमोक्य्राटिक पार्टी पाखें राष्ट्रपति पदया उम्मेदवार जो बाइडनं चुनावी फाइदाया निंतिं ट्रम्पं खोपया विषययात छ्यलाच्वंगु द्वपं बियादीगु दु। खोप सम्बन्धी ट्रम्पया प्रतिबद्धतायात अमेरिकी नागरिकतय्सं विश्वास मयाइगु बाइडनं धयादीगु दु ।
LEAVE YOUR COMMENTS