कुलमानयात हे कार्यकारी दयेकेत ओली सहमत

येँ- नेपाल विद्युत प्राधिकरणया कार्यकारि निर्देशकय् हाकनं कुलमान घिसिङ हे वइगु थ्यंमथ्यं पक्का जूगु दु । आः थुकिया निर्णय मन्त्रिपरिषद् पाखें याये जक ल्यं दनिगु खँ सीदुगु दु ।

घिसिङया कार्यकाल वइगु सोमवाः २९ गते क्वचायेत्यंगु दु । व धुंकाः सुयात हयेगु धयागु खँय् तःधंगु चर्चापरिचर्चा जुयाच्वंगु खः । देशय् न्हि हे १८–१८ घन्टा लोडसेडिङ जुयाच्वंगु अवस्थाय् कार्यकारि निर्देशक जूम्ह घिसिङ थः कार्यकारि निर्देशक जूगु छुं ई लिपा हे लोडसेडिङ चिइकूगु खः । थुकिया लिसें घाटाय् वनाच्वंगु प्राधिकरणयात अर्बौं तकाया नाफाय् हयाबीधुंकूगु दु । थ्व कारणं घिसिङयात हे मेगु कार्यकालया निंतिं कार्यकारि निर्देशक दयेकेमाः धयागु जनदबाब वयाच्वंगु खः । तर प्रधानमन्त्री केपी ओली व ऊर्जा मन्त्री वर्षमान पुन हे वय्कःयात निगूगु कार्यकालय् हयेगु विपक्षय् वनाच्वंगुलिं प्राधिकरणय् सु कार्यकारी वइ धयागु चर्चा तच्वयाच्वंगु खः ।

आः धाःसा प्रधानमन्त्री ओली नं घिसिङयात हे कार्यकारी दयेकेगु खँय् सहमत जुइधुंकूगु सीदुगु दु । नेकपाया मेम्ह अध्यक्ष पुष्पकमल दाहालं म्हिगः प्रधानमन्त्री नापलाये धुंकाः ओली घिसिङयात हे हाकनं हयेत सहमत जूगु खः । नेकपा दुने तच्वःगु दबाबय् लानाच्वंम्ह ओली प्रचण्डया दबाबया हे कारणं घिसिङयात हाकनं कार्यकारीइ हयेत सहमत जूगु खः । म्हिगः प्रचण्ड नापलायेधुंकाः प्रधानमन्त्री ओलीं ऊर्जा मन्त्रालययात कार्यकारि निर्देशक नियुक्ती सम्बन्धी प्रस्ताव हयेत निर्देशन बीधुंकूगु खँ धाःगु दु ।

प्रधानमन्त्री व ऊर्जा मन्त्री लोडसेडिङ चिइकेगुया जस फुक्कं घिसिङ जक काःगुलिं घिसिङ खनाः तम्वयाच्वंगु खः । तर आः दाहालया दबाब वयेवं प्रधानमन्त्रीया निर्देशन कथं ऊर्जा मन्त्रालयय् प्रस्ताव तयार याःगु दु । ऊर्जा मन्त्री पुनया प्रेस संयोजक दयानिधि भट्ट ऊर्जा मन्त्रालयं घिसिङयात हे हाकनं कार्यकारीइ हयेगु कथं प्रस्ताव तयार यायेधुंकूगु व आः आइतवाः व सोमवाः जुइगु मन्त्रिपरिषद्या बैठकं थुकिया निर्णय जुइगु खँ धयादीगु दु ।

सम्बन्धित बुखँ

LEAVE YOUR COMMENTS