नेवानिया झिंप्यम्ह कर्मचारी कोरोनामुक्त

येँ (नेपालभाषा टाइम्स) – राष्ट्रिय ध्वजावाहक नेपाल वायुसेवा निगमया झिंप्यम्ह उडान कर्मचारी कोरोनामुक्त जुयाः छेँय्लि हां वंगु दु ।

थीथी देशय् अलपत्रय् लानाच्वंपिं नेपाःया उद्धार यायेत खटे जूगु इलय् कोरोना भाइरस (कोभिड–१९)संक्रमण खने दुपिं इपिं वंगु शुक्रवाः कोरोनामुक्तज जुयाः छेँय् लिहां वंगु खः । उद्धारया ज्याय् संलग्न निगमया प्यम्ह पाइलटलिसें झिंप्यम्ह क्याबिन क्रुयात कोरोना संक्रमण जूगु खःसा इपिं सकलें वासः याकाः छेँय् लिहां वंगु निगमं जानकारी बिउगु दु ।

विदेशय् अलपत्र नेपाःमियात उद्धार यायेगु ज्याय् संलग्न इमित वंगु असार २२ गते पीसीआर परीक्षण याःगु इलय् रिपोर्ट पोजिटिभ वःगु खःसा अनंलि बाःछि लिपा हाकनं याःगु परीक्षणय् नेगेटिभ रिपोर्ट वयेवं इपिं सकलें थःथःगु छेँय् लिहां वंगु निगमया प्रवक्ता अर्चना खड्कां कनादीगु दु ।

थ्व हे झ्वलय् कोरोना भाइरसया कारणं वंगु छवाःया दुने विदेशय् च्वनाच्वंपिं झिंखुम्ह नेपाःमि सीगु दु। विश्वन्यंकं महामारीया रुपय् न्यना वनाच्वंगु कोरोनाया कारणं थ्व छवाःया दुने कतारय् च्याम्ह, संयुक्त अरब इमिरेट्स (युएइ)य् न्याम्ह व कुवेतय् स्वम्ह सीगु खः ।

थुकिया लिसें वंगु शनिवाःतकया दुने १४ गू देशय् १६०म्ह नेपाःमि कोरोनाया कारणं सीगु गैरआवासीय नेपाली संघं जानकारी बिउगु दु ।