इन्द्रेणी कम्प्लेक्सया जीम सेन्टरय् मिं नयाः निगू करोड तका क्षति

येँ – न्हू बानेश्वरय् च्वंगु इन्द्रेणी कम्प्लेक्सया जीम सेन्टरय् मिं नयाः निगू करोड तका क्षति जूगु दु । सोमवाः न्हिनय् ३ बजे जिम सेन्टरय् मिं नःगु खः । मिं नयाः जिम सेन्टरया सामान च्यानाः निगू करोड तका स्वयां अप्वः नोक्सानी जूगु खँ प्रहरीं धाःगु दु । मिं नःगु सुचं वयेधुंकाः नेपाल प्रहरी, सशस्त्र प्रहरी, नेपाली सेना व दमकलया पुचः घटनास्थलय् थ्यंकाः मि नियन्त्रणय् काःगु खः ।

प्रहरीया कथं इन्भरटरय् मिं नयाः मि न्यनावंगु खः । येँ, ख्वप व यलया स्वंगुलिं जिल्लाया दमकल इलय् थ्यंगुलिं मि इलय् नियन्त्रणय् कायेफुगु खँ प्रहरीं धाःगु दु ।

उकथं हे कागेश्वरी नगरपालिका मुलपानी पिपल बोटय् च्वंगु युवराज खत्रीया तृष्णा जोन अफ कलर्सय् नं मिं नःगु दु । सोमवाः सुथय् ४ बजे मि नःगु खःसा निघौंया दुने मि नियन्त्रणय् वःगु खः । मिं नयाः पसलय् दुगु फुक्कं सामान नष्ट जूगु दु । मि नियन्त्रणय् कायेगु नितिं येँ, यल व ख्वपया दमकल छ्यःगु खः । अन मिं नयाः ४ करोड तका बराबरया क्षति जूगु दु ।