न्हियान्हिथं हिदान

येँ- कोरोना महामारी व लकडाउनया कारणं स्वनिगलय् हिया अभाव जुयावयेवं लायन्स क्लब अफ काठमाडौं इन्द्रायणी खुसिबुं न्हियान्हिथं हिदान यानाच्वंगु दु । थ्व झ्वलय् आइतवाः येँया त्यंग त्वालय् हिदान जुल । आः क‌ंस ग्वंगुबुँइ, वयां कन्हय् कुन्हु सामाखुसीइ हिदान जुइगु खँ लायन्स क्लब अफ काठमाडौं इन्द्रायणीया सचिव निर्मल महर्जनं कनादीगु दु ।

वय्कःया कथं त्यंगलय् जूगु हिदान च्यान्हुगु न्हि खः । थ्वयां न्ह्यः ख्यःकेब, भगवानबहाल, छाउनी ताहाचल, खुमलटार, म्हेपी, चोबहाः द्यः, ब्रम्हूत्वालय् हिदान जुइधुंकूगु दु । थ्व झ्वलय् आःतक २९० पिन्ट हि मुनेधुनागु खँ वय्कलं धयादीगु दु ।

लकडाउन लिपा हिया अभाव जुयाच्वंगु खबर वयाच्वंगु लिसें लायन्स क्लब डिष्ट्रिकपाखें नं हिदान यानाबीमाल धयागु जानकारी वयाच्वंगुलिं थःपिंसं थुकथं न्हियान्हिथं हिदान यानाच्वनागु खँ भाजु महर्जनं कनादिल । क्लबया स्थानीय जःपिंलिसे समन्वय यानाः हिदान ज्याझ्वः जुयाच्वंगु खः ।