थौं सुख्खा बन्दरगाहया शिलान्यास

‘येँ – चोभारय् सुख्खा बन्दरगाह दयेकेगु लागिं थौं प्रधानमन्त्री केपी ओली शर्मां शिलान्यास याइ धाःगु ज्याझ्वः स्थगित जुइफइगु खँ धाःगु दु । चोभार संरक्षण समितिया संयोजक पञ्चलाल महर्जनं ‘नेपालभाषा टाइम्स’ लिसें खँ ल्हासें स्थानीय जनतां विरोध याइगु जूगुलिं प्रधानमन्त्री ओलीं थ्व ज्याझ्वः स्थगित याये फइगु खँ कनादीगु खः ।

थौं जुइगु शिलान्यास ज्याझ्वलय् संघीय सांसदया लिसें प्रदेशया सांसदत तकं मवइगु कथं थःपिंसं लविङ यानाच्वनागुलिं प्रधानमन्त्री मवयेफुगु खँ वय्कलं कनादिल । लिसें ज्याझ्वलय् किपू नगरपालिकाया मेयर व उपमेयर लिसें वडाध्यक्ष तकं सहभागी जुइ मखु धकाः धायेधुंकूगुलिं शिलान्यास यायेगु ग्वसाः स्थगित जुइ फइगु दावी नं वय्कलं यानादिल ।

थुकिया बारे निर्णय यायेत मन्त्रिपरिषदय् खँ थ्यंकेगु कथं लविङ जुइधुंकूगुलिं आः मन्त्रिपरिषदं छुं निर्णय याये फइगु खँ धाःगु दु ।

# फास्ट ट्राय्कया जीरो प्वाइन्ट

थ्वहे झ्वलय् फास्ट ट्रायकया जिरो प्वाइन्ट गन तयेगु धइगु बारे अझं निर्णय जुइ मफुनिगु खँ सीदुगु दु । फास्ट ट्राय्कया जिरो प्वाइन्ट ख्वनाय् याये मजिउगु धासें स्थानीय जनतां विरोध यानाच्वंगु दुसा मेखे वातावरणविद्तय्सं नं फास्ट ट्रायकया जिरो प्वाइन्ट ख्वनाय् तल धाःसा स्वनिगः अझ नं प्रदुषित जुइगु धासें जिरो प्वाइन्ट स्वनिगलं पिने तयेमाःगु सुझाव बिउगु दु ।

स्वनिगःया भौगोलिक अवस्था कचौरा थें जूगुलिं फास्ट ट्राय्क लिपा स्वनिगलय् दुहां वइगु गाडीया धू व कुँ स्वनिगलं पिहां वने मफयाः वातावरणय् थप समस्या वइगु वातावरणविद्तय् धापू दु । अज्याःगु अवस्था वल धाःसा स्वनिगः हलिंया हे दकलय् प्रदुषित शहर जुइफइगु जूगुलिं थुगु खँय् सचेत जुइमाःगु तर्क तयाच्वंगु दु ।

थनया फय् पिहां वनेत थसकं थाकुगुलिं धू व कुँ स्वनिगःया सर्गतय् मुनाः थीथी समस्या पिकाये फइगु खँ धाःगु दु ।

सम्बन्धित बुखँ

LEAVE YOUR COMMENTS