राष्ट्रियसभाय् लक्ष्मीदास !

येँ – राष्ट्रिय सभाय् आः खाली जुइत्यंगु मनोनितपाखेया छगू सिटय् सुयात यंकेगु धइगु खँय् सत्तारुढ दल नेकपा दुने वहस शुरु जूगु खँ सीदुगु दु । मनोनित कोटां हयातःम्ह अर्थमन्त्री डा. युवराज खतिवडाया म्याद आः वइगु फागुन २० गते फुइत्यंगु दु ।

उगु थासय् आः वय्कःयात हे हानं दोहरे यायेगु खः वा मेम्ह मनू हयेगु खः धइगु खँय् पार्टी दुने वहस जूगु खः । पार्टीं मेम्ह मनूया रुपय् नांजाःम्ह उद्योगपति लक्ष्मीदास मानन्धरया नां न्ह्यःने लानाच्वंगु खँ सूत्रं धाःगु दु । न्हापा नं एमालेपाखें राष्ट्रिय सभाया सदस्य जुयादीधुंकूम्ह मानन्धर थौंकन्हय् प्रधानमन्त्रीया समेत छनौटय् लानाच्वंगु खँ नं धाःगु दु । थ्व बारे मानन्धरयाके न्यनेकने यानाबलय् वय्कलं थःगु नं नां पासापिंसं यंकातःगु खःसां उकिया बारे छु जुयाच्वन धइगु जानकारी धाःसा मदुगु खँ कनादिल ।