देय् दबूया बुसादँया लसताय् भर्चुअल भिंतुना कालबिल

येँ- नेवाः देय् दबूया २६ क्वःगु बुदिंया लसताय् देय् दबूया उदयपुर जिल्ला कमिटी व उपमहानगर समिति धरान (सुनसरी)या ग्वसालय् भर्चुअल मुँज्यापाखें भिंतुना कालबिल ज्याझ्वः जुल ।

ने.सं. ११४० यंलाथ्व द्वादशि, आइतवाःकुन्हु उदयपुर जिल्ला कमिटीया ग्वसालय् नेवाः समृद्धिया निंतिं देय् दबूया भूमिका विषयय् अन्तक्रिया ज्याझ्वः जूगु खः । जिल्ला कमिटीया नायः गौरीशंकर उदासया सभापतित्वय् जूगु ज्याझ्वलय् धरानया नेवाः न्ह्यलुवा बालकृष्ण हलुवाईं स्वनिगलं पिने च्वंपिं नेवाःतय्सं नेवाः भाय् मसः धकाः भाय् ल्हायेगु हे त्वःतेगु व सुनानं नेवाः भासं खँ ल्हाःसा जिमिसं मथू धकाः धायेगु याना हयाच्वंगु खँय् दुःख प्वंकादिसें नेवाःतय्सं थुकथं भाय् ल्हायेगु त्वःता हल धाःसा कन्हय् वनाः नेवाः जाति हे विलय जुया वनीगु अवस्था वयेफु धयादिल । वय्कलं नेवाः जातिया पहिचान मेमेगु जातिया भाषा, संस्कृति व संस्कार स्वयां फरक व उच्च जूगु धासें थुकियात कायम याना तयेगु निंतिं पहल यायेमाः धयादिल ।

देय् दबूया पुलांम्ह मूछ्याञ्जे पवित्र वज्राचार्यं थौं देय्या आपालं स्थानीय निकायय् नेवाःतय्सं नेतृत्व यानाच्वंगु अवस्थाय् अज्याःगु निकायपाखें नेवाःतय् उत्थानया निंतिं ज्याझ्वःत दयेकाः अवसर कायेमाः धयादिल । वय्कलं नेवाःत राजनीतिपाखें तापाना वनाच्वंगु व राजनीति धाल कि नेवाःतय्त न्यने हे मयःगु अवस्थाय् थःपिनिगु कार्यकालय् थःथःगु आस्था व सिद्धान्त ज्वनाः पार्टी दुने च्वनाच्वंपिं नेवाःतय्सं पार्टी दुने हे नेवाःया हक अधिकारया निंतिं सः थ्वयेकेत नीतिगत रुपं हे न्ह्याः वनेमाःगु खँय् बः बियागु खँ धयादिल ।

मोरंगया सुरेश श्रेष्ठं राजनीतिक दलतय्सं कार्यकर्तातय्के व भारतं वयाच्वंपिंसं नं मारवाडीतय्के लेभी म्हयेगु यानाच्वंगु सन्दर्भयात न्ह्यथँसें आः नेवाः देय् दबूया केन्द्रनिसें जिल्ला व नगरं तकं प्रत्येक नेवाःतय्के लेभी म्हयेगु ज्या न्ह्याकेमाः धयादिल ।

सुनसरीया तीर्थ मास्कें नेवाःतय् तःजिगु नखः मोहनि व स्वन्तिया इलय् आपाः हे तिथि विवादं नखः हनेत अलमल जुयाच्वंगु धासें थुकी एकरुपता हयेगु निंतिं कुतः यायेगु स्वयेमाः धयादिल ।

महेश शाक्य (धरान), दिनेश शाक्य (झापा), नेवाः मिसा दबूया केन्द्रीय न्वकु नापं प्रदेश नं १ या इन्चार्ज विमला प्रधान, गोपाल श्रेष्ठ, सोम श्रेष्ठ, सरला कायस्थ, कृष्ण उदास लगायतं नं नुगःखँ प्वंकादीगु ज्याझ्वलय् दबूया केन्द्रीय नायः नरेश ताम्राकारं मूपाहांया थासं नुगःखँ तयादीगु खः । देय् दबूया हे बुसादँया लसताय् यंलाथ्व त्रयोदशिकुन्हु सुनसरी जिल्लाया धरान उपमहानगरपालिकाया ग्वसालय् नं भर्चुअल मुँज्यापाखें भिंतुना कालबिल ज्याझ्वः जुल ।

उपमहानर कमिटीया नायः मनोहर शाक्यया सभापतित्वय् दबूया केन्द्रीय नायः नरेश ताम्राकारया प्रमुख आतिथ्यताय् न्ह्याःगु ज्याझ्वलय् नं दबूया थीथी जिल्लाया प्रतिनिधि, आदिवासी जनजाति महासंघ प्रदेश १य् आवद्ध थीथी जनजाति संगठनया प्रतिनिधि, विदेशस्थित नेवाः संघसंस्थाया प्रतिनिधितय्सं नं भिंतुना देछानादीगु खः ।

ज्याझ्वलय् आदिवासी जनजाति महासंघ प्रदेश १ पाखें चित्र थापामगर, राष्ट्रिय नेवाः खलः इजरायलया पुलांम्ह नायः नरेशकुमार श्रेष्ठ, देय् दबू प्रदेश १ या संयोजक सोम श्रेष्ठ, प्रदेश १ या इन्चार्ज कृष्ण उदास, केन्द्रीय सल्लाहकार सरला कायस्थ, प्रदेश १ या प्रदेश सांसद सावित्रि जोशी श्रेष्ठ, लगायतं नुगःखँलिसें भिंतुना न्वचु बियादीगु खः । उगु इलय् देय् दबू केन्द्रपाखें घोषणा याःगु नेवाः भाषा संस्कृति अक्षय कोषया निंतिं तीर्थ मास्के व मय्जु चन्द्रा हलुवाई म्हर्ति न्याद्वः न्याद्वः तका तयेगु बचं बियादीगु खः ।

ज्याझ्वलय् नवासें प्रदेश सांसद श्रेष्ठं देय् संघीय संरचनाय् वनेधुंकूगु व थज्याःगु अवस्थाय् स्वंगू तहया सरकार निर्माण जूसां थःपिनिगु खँ संघ, प्रदेश व स्थानीय स्वंगुलिं तहया सरकारं न्यनेगु ज्या मयानाच्वंगु खँय् असन्तुष्टि प्वंकादिल । वय्कलं संगठन धइगु तसकं आवश्यक जू धासें संगठन मंत धाःसा गुगुं नं सरकारं खँ मन्यनीगु धयादिल ।

मूपाहांया थासं दबूया केन्द्रीय नायः ताम्राकारं नेवाः भाय् व संस्कृतिया उत्थानया निंतिं देय् दबूया बुसादँया लसताय् जूगु भर्चुअल ज्याझ्वलय् नेवाः भाषा संस्कृति संरक्षण कोष स्वनेगु घोषणा यानागु खँ कनादिसें दछिया दुने कोषय् छगू करोड तका दां मुंकेगु लक्ष्य कयागु जानकारी बियादिल ।

वय्कलं सांसदतय्सं नं नेवाः नखःयात महत्व बीमाःगु खँय् बः बियादिसें दक्वं प्रदेशय् सांसदतय्सं प्रदेश सभाय् खँ ल्ह्वनेमाः धयादिल । देय् दबू नेपाः जक मखसे विश्वन्यंकंया नेवाःतय्त छप्पँ यायेगु आज्जु ज्वनाः न्ह्याः वनाच्वंगु धासें नेवाःया भाषा, कला, संस्कृति, पहिचान, नेवाः जातिया अस्तित्वया सवालय् देय् दबू अर्जुनदृष्टि तयाः न्ह्यःने वनाच्वंगु दु धयादिल ।

कोभिड-१९या कारणं जनजीवन प्रभावित जुयाः स्थिति असहज जुयाच्वंगु वर्तमान अवस्थाय् स्थिति सहज जुया वनेवं ईयात ल्वःकथं देय् दबूया विधान संशोधन यायेगु व अनंलि याकनं हे तःमुँज्या यानाः सर्वसम्मतिं न्हूगु नेतृत्वयात पदभार हस्तान्तरण यायेत स्वयाच्वनागु नं धयादिल ।