संस्कृतिप्रेमी शरद डंगोल

येँ देय् छगू सांस्कृतिक सहर खः । थ्व हे सांस्कृतिक सहरया मू केन्द्र थनया लाय्कू लागा । वसन्तपू, हनुमानध्वाखा, वंघः केन्द्र जुयाः थनया ऐतिहासिक, सांस्कृतिक गतिविधि आपालं जू । उकिसनं राष्ट्रिय महत्वं जाःगु येँयाः नखः नं थ्व हे थाय् जःखः केन्द्रीत जुयाः आपालं गतिविधि जुयाच्वनी । येँ महानगरपालिका २४ वडा (साविक २५)या वंघः केन्द्रविन्दु जुयाः येँयाःया आपालं गतिविधि जुयाच्वनीगु थाय् खः । नापं थनया मू आकर्षण धइगु वंघः आजु द्यः अर्थात श्री आकाश भैरवनाथ ।

थ्व हे वंघः त्वाःया नायःनापं वंघः आजु द्यःया छेँ (देगः) जिर्णोद्वार समितिया सचिव जुयाः यानादीम्ह व्यक्तित्व खः शरदकुमार डंगोल ‘विष्णुवीर’ । वि.सं. २००५ सालय् अबु गोविन्दवीर डंगोल व मां पूर्णदेवी डंगोलया क्वखं वय्कःया जन्म जूगु खः ।

येँ देय्या परम्परागत ३२ गू त्वाःमध्ये छगू वंघः त्वाःया ज्यापुतय्सं वंघः आजुयात थः आराध्य द्यःया रुपय् माने याना वयाच्वंगु दु । थ्व हे आजु द्यःया द्यःछेँ ल्ह्वनेगु निंतिं नीस्वंगु समितिइ वय्कलं छ्याञ्जे जुयाः ज्या यानादीगु खः । तत्कालीन २५ वडाअध्यक्ष विकासभक्त श्रेष्ठया अध्यक्षताय् गठन जूगु श्रीआकाश भैरवनाथ मन्दिर जिर्णोद्वार समितिया सचिव जुयादीम्ह वय्कः थीथी संघसंस्थाय् आवद्ध जुयाः सामाजिक ज्याय् क्रियाशील जुयाच्वनादीम्ह खः ।

श्रीआकाश भैरवनाथ गुथि न्यय्न्हय् खलः पुजारी वा गुथ्याःत दुथ्यानाच्वंगुलिइ गुथिया आवश्यक ज्या यायेत १५ म्हेसिया संचालक समिति गठन यानातःगु दु । गुगु संचालक समितिया वय्कः नायः खः । वंघः त्वाःया त्वाः नायःलिसें सामाजिक ख्यलय् थीथी संघसंस्थाय् अध्यक्ष, वरिष्ठ उपाध्यक्ष, उपाध्यक्ष, महासचिव, सचिव, कार्यकारी सदस्य सल्लाहकार आदि जुयाः थःगु भूमिका म्हितादीगु दु । श्री आकाश भैरवनाथ गुथि संचालक समिति, श्री आकाश भैरवनाथ व्यवस्थापन समुदायया अध्यक्ष जुयादीम्ह वय्कलं श्री आकाश भैरवनाथ बचत तथा ऋण सहकारी संस्थाया नं अध्यक्ष जुया ज्या यानादीधुंकूगु दु ।

२०५८ सालय् तत्कालीन जुजु ज्ञानेन्द्र व लानि कोमलं आजु द्यःयाथाय् पाःताः ख्वला पुजा याःगु इलय् वय्कः स्वयम छम्ह गुथ्याःयालिसें पुजारी नं जूगु ल्याखं पुजा याकादीगु खः । वंघः आजु द्यःयाथाय् आतक शाहवंशपाखें गुगुंकथंया पुजा याःगु इतिहास मदु ।

थुकथं हे वय्कः इन्द्रजात्रा व्यवस्थापन समिति सामाखुसि उपभोक्ता संघ, नयाँ बजार जग्गा एकीकरण उपभोक्ता संघ, नेपाल रेडक्रस सोसाइटी, फ्रेण्डशीप युथ क्लब, ज्यापु संस्कृति विकास कोष थेंज्याःगु संघसंस्थाय् नं पदीय व कार्यकारी जुयाः थम्हं योगदान बियादीगु दु ।

लजगाःया झ्वलय् तत्कालीन श्री ५ या सरकार सहकारी विभाग अन्तर्गत थीथी जिल्ला सहकारी ज्याकुथिइ सहकारी सहायक निरीक्षकया रुपय् नं वय्कलं न्हय्दँ तक ज्या यानादीगु दु । नेपाल टे«डिशनल क्राफ्ट्स एक्सपोर्टसय् लेखा अधिकृत जुयाः न्यादँ तक ज्या यानादीम्ह वय्कलं थीथी व्यापारिक फर्मय् लेखा तयेगु व लेखा परीक्षकया रुपय् नं ज्या यानादीगु दु ।

अथे हे साउथ इष्ट वन्सरटिभ इन्टरनेशनल डेभलपमेन्ट (सेसिड, युएसए)या भौचर एक्जामिनरया रुपय् ज्या यानादीम्ह वय्कलं येँस्थित क्यानाडाया एनडीएल इन्टरनेशनलय् अफिस म्यानेजरया रुपय् नं ज्या यानादीगु दु । दी जुद्ध म्याच फ्याक्ट्रीया नं वय्कलं कम्पनी सचिव जुयाः छुँ दँ ज्या यानादीगु दु ।

मचांनिसें हे च्वयेगु रहर यानादीम्ह वय्कलं विषयगत रुपं छु च्वयेगु धकाः निर्णय याना मदीसां थीथी पत्रपपत्रिकाय् फुटकर च्वसु च्वयाः पिथनेगु याना वयाच्वनादीगु दु । च्वयेगुलिइ नं ल्हाः न्ह्याःम्ह वय्कलं नेपालभाषाया म्येँ नं च्वयादीगु दु । गुगु म्येँ लोकंह्वाःम्ह म्येँ हालामि मदुम्ह रमेश ताम्राकारया सः दुथ्यानाच्वंगु दु ।

फुटकर च्वसु जक च्वया वयाच्वनादीम्ह वय्कलं दकलय् न्हापां २०७३ सालय् ‘बखतवीर डंगोलको पुस्तेवारी’ सफू च्वयाः प्रकाशनय् हयादिल । अनंलि व हे दँय् वय्कलं थःगु निगूगु कृतिकथं ‘निध्वः’ (दुइ रेखा) प्रकाशनय् हयादीगु दुसा स्वंगूगु कृतिया रुपय् ‘संगालो सुुत्र’ पिथनादीगु दु ।

औपचारिक रुपं बीकम तकया शिक्षा कयादीम्ह वय्कलं लेखा परीक्षकया नं तालिम कयादीगु दु । थीथी थीथी भाय्या नं ज्ञाता वय्कः प्रबल गोरखा दक्षिणवाहु चौथोपाखें नं विभूषित जुयादीधुंकूगु दु । अथे हे आपालं संघसंस्थापाखें नं वय्कः सम्मानित जुयादीगु दु ।

थुकथं थःगु न्वाःनापं सामाजिक, आर्थिक, सांस्कृतक, भाषिक ख्यलय् थःगु हे कथं सक्रिया जुया वयाच्वनादीम्ह वय्कः शरदकुमार डंगोल वंगु पोहेलागा दशमि (माघ ३)कुन्हु ७४ दँया उमेरय् दिवंगत जुयादीगु खः ।