येँ भिंद्यःत्वाःया छम्ह कोरोना संक्रमणं मन्त

येँ – येँ महानगरपालिका २० वडा भिंद्यःत्वालय् छम्ह जिथि कोरोना भाइरस संक्रमणं सीगु दु । भिंद्यःत्वाःया लाखे ननि थहां वनेगु गल्ली छेँ दुम्ह स्थापित थरया उम्ह जिथिम्ह मिसा म्हीग अस्पतालय् उपचार यायां मदुगु खः । येँ महानगरपालिकाया जनस्वास्थ्य विभागं ६६ दँया उम्ह जिथियाके कोरोना संक्रमण जूगु पुष्टि याःगु खः ।

न्हापा हे दम ल्वय् दुम्ह व टिबी ल्वचं नं थी धुंकूम्ह उम्ह जिथियात सासः ल्हाये थाकुया अस्पताल यंकूग खँ धाःगु दु । अस्पतालय् भेन्टिलेटरय् तयाः उपचार यायेगु झ्वलय् कोरोना संक्रमण पुष्टि जूगु खः । मदुम्हेसिया अन्तिम संस्कार म्हीग हे क्वचायेधुंकूगु दु ।

येँ महानगरपालिका जनस्वास्थ्य विभागं आः कन्हय् निसें उम्ह मिसाया छेँजःपिं लिसे सम्पर्कय् वःपिनि कन्ट्याक्ट ट्रेसिङ्ग यायेगु खँ धाःगु दु । येँ निषेधाज्ञा जारी यानातःगुलिं छेँयात सिल हे मयाःसां छेँजःपिंत छेँनं पिहां मवयेत धयातःगु दु ।