सर्वेन्द्र खनाल व निम्ह सांसद् विरुद्धया जाहेरी कायेत प्रहरीपाखें अस्वीकार

येँ – पुलाम्ह प्रहरी महानिरीक्षक सवेन्द्र खनाल व सत्तारुढ नेपाल कम्युनिष्ट पार्टीया सांसदत महेश बस्नेत व किसान श्रेष्ठ विरुद्ध अपहरण व शरीर बन्धकया जाहेरी दर्ता यायेत नेपाल प्रहरी महानगरीय परिसरं अस्वीकार याःगु दु ।

पुलाम्ह राज्यमन्त्री नापं सांसद डा. सुरेन्द्र यादवयात अपहरण यानाः जनकपुरं येँ हःगु धासें उकीया विरुद्ध जाहेरी बीत जनता समाजवादी पार्टीया नेतात आइतवाः न्हिनय् महानगरीय प्रहरी परिसर टेकुइ वंगु खः ।

परिसरया प्रमुख एसएसपी श्याम ज्ञवालीं उगु जाहेरी दर्ता यायेत अस्वीकार यानादीगु खः । वस्वयां न्ह्यः ज्ञवाली मदुगु इलय् अनया डिएसपीतय्सं उजुरी कायेत माने मजूगु व यदि दर्ता यायेमाःगु खःसा महोत्तरी वनाः दर्ता यायेत इनाप याःगु खः ।

जाहेरी बीत प्रहरी ज्याकु थ्यंकादीम्ह पुलाम्ह प्रधानमन्त्री नापं जनता समाजवादी पार्टीया नेता डा. बाबुराम भट्टराईं ओलीतन्त्रय् प्रहरी व कर्मचारी फुक्कं ग्यानाच्वंगु धयादिसें च्वयेया आदेश वःगुलिं प्रहरीं मुद्दा दर्ता यायेत अस्वीकार याःगु प्रतिक्रिया बियादिल ।

अपहरणया जाहेरी बीत जनता समाजवादी पार्टीया भट्टराई नापं उपेन्द्र यादव, अशोक राई, राजेन्द्र श्रेष्ठ, राजेन्द्र महत्तो, सरतसिंह भण्डारी, हिसिला यमि लगायत टेकुइ थ्यंकादीगु खः ।

वंगु वैशाष १० गते पुलाम्ह प्रहरी महानिरीक्षक सवेन्द्र खनाल व सत्तारुढ नेपाल कम्युनिष्ट पार्टीया सांसदत महेश बस्नेत व किसान श्रेष्ठं तत्कालीन समाजवादी पार्टी तछ्यायेत महोत्तरी वनाः सांसद यादवयात येँ हःगु खः ।