प्रम ओलीया ‘राष्ट्रवादी छबी’ छ्याताहां जूगु विश्लेषण

येँ – राष्ट्रवादी छबी दुम्ह धकाः नांजाःम्ह प्रधानमन्त्री केपी ओलीयात अन्ततः भारतं हे साथ बियाः सत्ताय् टिके यानातःगु खँ प्रस्ट जूगु दु । ओलीयात भारतया साथ दुगु कारणं हे जसपाया अध्यक्ष महन्थ ठाकुर खेमां समर्थन यानाच्वंगु खँ नं स्पष्ट जूगु दु ।

भारतया सत्तारुढ दल भाजपाया नेता एस. सुब्रमण्यमं म्हीग छगू ट्विट यासें नेपाःया वर्तमान राजनीतिक अवस्थाय् भारतया छनौट धइगु प्रधानमन्त्री केपी ओली हे खः धयादीगु खः । सुब्रमण्यमया ट्विट थौंकन्हय् नेपाःया राजनीतिइ अतिकं चर्चाया विषय जुयाच्वंगु दु । सुब्रमण्यमं छुं जुयाः ओलीया सरकार चिलाः प्रचण्ड प्रधानमन्त्री जुल धाःसा चीनया विजय जुइ धासें भारतं ओलीयात हे समर्थन यानाच्वनेमाःगु आशय समेत प्वंकूगु खः ।

थुकिया नापनापं भारतं पिहां वइगु अंग्रेजी न्हिपौ ‘हिन्दूस्तान टाइम्सं’ म्हिगः सम्पादकीय हे च्वसें प्रधानमन्त्री केपी ओलीयात भारतं समर्थन याये मजिउगु बिचाः न्ह्यब्वःगु दु । ओलीं नेपाःया लोकतन्त्र बांलाक सञ्चालन मयाःगु द्वपं बिसें नेपाःया थीथी जातीय पुचःतय् दथुइ ओलीं आपालं भेदभाव समेत यानाच्वंगु खँ नं उगु सम्पादकीयय् धयातःगु दु ।

भारतीय राजनीति व मिडियाय् वःगु थुपिं खँयात विश्लेषण यासें नेपाःया राजनीतिक ख्यलं प्रधानमन्त्री केपी ओलीं छुं ई न्ह्यः मधेस आन्दोलनयात दमन यानाः निर्माण याःगु राष्ट्रवादी छबीया ‘धोती खुस्के जूगु’ टिप्पणी यानाहःगु दु । प्रधानमन्त्री ओलीयात न्हापा राष्ट्रवादी छबी दुम्ह नेता धकाः यक्व तारिफ याःगु खःसां आःया सन्दर्भं धाःसा वय्कः नं अन्ततः भारतीय गोटी जक लानाच्वन धकाः पुष्टि जूगु खँ धयाहःगु दु ।

थ्वहे झ्वलय् प्रधानमन्त्री ओलीयात जसपा दुनेया पूर्व राजपा गुटय् च्वंपिं महन्थ ठाकुर, राजेन्द्र महतो थेंज्याःपिं नेतातय्सं साथ बियाच्वंगुया मू कारण नं थ्वहे जुयाच्वन धकाः पर्दाफास जूगु खँ नं थन धयाहःगु दु । ओलीयात न्ह्याथे यानाः नं टिके याना तयेमाः धयागु भारतया लाइन दुगु कारणं हे महन्थ ठाकुरपिंसं ओलीयात साथ बियाच्वंगु स्पष्ट जूगु दु ।

लुमंकेबहः जू, पूर्व राजपाया महन्थ ठाकुर, राजेन्द्र महतो आदि नेतात नेपाःया संविधान जारी जूगु इलय् नं न्हू दिल्ली वनाः अनया नेतातलिसे सल्लाह याःगु खः । अबलय् मधेशवादी दलतय्सं याःगु आन्दोलनयात समर्थन यासें भारतं नेपाः विरुद्ध नाकाबन्दी समेत याःगु खः । अबलय् मधेशवादी दलतय्सं याःगु आन्दोलनयात फुक्क हे राजनीतिक पार्टीतय्सं साथ बिउगु खःसां तत्कालीन प्रधानमन्त्री केपी ओलीं सुयां खँ मन्यँसे दमन हे याना छ्वःगु खः ।

सम्बन्धित बुखँ

LEAVE YOUR COMMENTS