येँ महानगर दुने ७५२ म्ह कोरोना संक्रमित
येँ (नेपालभाषा टाइम्स) – येँ महानगर दुने वंगु साउनया लिपांगु ई तकया दुने कोरोना संक्रमित जूपिनिगु ल्याः ७५२ म्ह थ्यंगु दु। येँ महानगरपालिका जनस्वास्थ्य महाशाखापाखें प्राप्त विवरणकथं महानगर दुनेया कोरोना संक्रमण पुष्टि जूपिं ७५२ म्ह दुसा सीपिं प्यम्ह दु ।
महाशाखां बिउगु जानकारीकथं वंगु साउन २९ गतेतकया दुने कोरोना पोजेटिभ खने दुपिं व्यक्तिया प्रत्यक्ष सम्पर्कय् वःपिं १,५५४ म्हेसिया कन्ट्याक्ट ट्रेसिङ याःगु दु। उकीमध्ये न्यय् च्याम्हेसित कोरोना पोजेटिभ खने दुगु महाशाखां न्ह्यथंगु दु ।
महाशाखाया वरिष्ठ कविराज निरीक्षक ज्ञानबहादुर ओलीं तःतःधंगु अस्पतालया विवरण थुकी दुमथ्याःगुलिं न्ह्यथनागु ल्याखय् छु छुं भचा उखेथुखे लायेफुगु जानकारी बियादीगु दु। ततःधंगु सरकारी निकाय सर्वोच्च अदालत, अख्तियार दुरुपयोग अनुसन्धान आयोग व नेपाली प्रहरी लगायतया ज्याकुथिइ नं परीक्षण याःगु दुसा थुकथं सरकारी ज्याकुथिइ याःगु परीक्षणमध्ये छुं छुंया जक तथ्यांक महानगरया जनस्वास्थ्य महाशाखायात उपलब्ध याकूगु व छुंया ल्याः धाःसा प्राप्त मजूनिगु वय्कलं कनादिल । थुकथं छुं छुं ल्याः प्राप्त मजूनिगुलिं उपलब्ध धलखय् छुं भचा उखेथुखे लाये फइगु वय्कःया धापू दु ।
मेखे संक्रमण तीव्र रुपं अप्वया वनाच्वंगुलिं नं उकिया ल्याखय् च्वय् क्वय् जुइफुगु धासें वय्कलं वंगु साउन २९ गते तकया दुने महानगरय् दुगु संक्रमितया ल्याः जक बी फइगु अवस्था दुगु नं वय्कलं स्पष्ट यानादिल ।
येँ महानगर दुनेया ३२ गू वडामध्ये दकलय् अप्वः संक्रमित वडा नं. ४य् खने दुगु महाशाखां जानकारी बिउगु दु। महाशाखायाकथं वडा नं. ४य् ख्वीछम्ह संक्रमित दु। अख्तियार दुरुपयोग अनुसन्धान आयोगय् याःगु परीक्षणपाखें संक्रमित जूपिं नं थुगु वडाय् हे लाकातःगुलिं अप्वः संक्रमित खने दुगु महाशाखां स्पष्ट याःगु दु ।
उखे महानगर दुनेया वडा नं. २ लय् धाःसा आतक छम्ह नं कोरोना संक्रमण जूपिं पुष्टि जूगु मदुनि । वडा नं. २ या वडाअध्यक्ष राजेन्द्रकुमार श्रेष्ठया कथं वडाय् थःपिंसं कोरोना विरुद्ध व्यपाक रुपं प्रचार प्रसार यानागु नापं सुयात मदिक्क मुसु वल, सेखं चाल वा तसकं ज्वर वल धाःसा वडाय् जानकारी बीत वडावासीयात इनाप यानागु व आतक थःपिंत उकथंया संकेत खने दुगु धकाः सुं नं वडाय् वःगु मदुनि ।
महानगर दुने संक्रमितया पहिचान, इमिगु प्रत्यक्ष वा अप्रत्यक्ष सम्पर्कय् दुपिंत मालेगु, निगरानी तयेगु ज्यायात व्यवस्थित यायेगु ल्याखं महानगरं कन्ट्याक्ट ट्रसिबयात तीव्रता बिया हयाच्वंगु दु। संक्रमित खने दुगु थासय् सम्बन्धित वडा ज्याकुथिं प्रहरीलिसे समन्वय यानाः उगु लागाय् वयेवने बन्द यानाः निगरानी तयेगु ज्या नं याना वयाच्वंगु दु ।
थ्व हे झ्वलय् येँ मनपा वडा नं. ३२ य् लिपांगु इलय् कोरोना संक्रमण जूपिं निम्हमध्ये छम्ह डायलोसिस यायेमाःम्ह ल्वगि जूगु खँ सीदुगु दु । सहयोगी नगरय् च्वंम्ह ३५ दँ दुम्ह डायलोसिस यायेमाःम्ह मिसायात संक्रमण जूगु खः ।
LEAVE YOUR COMMENTS