ने. सं. ११४६ तछलाथ्व पारू -

येँमपा १८ वडाया भवन उलेज्या

येँ – येँ महानगरपालिका १८ वडा ज्याकूया न्हूगु भवनया उलेज्या येँ महानगरपालिकाया प्रमुख विद्यासुन्दर शाक्यं यानादिल । येँ मनपाया १८ वडाया उगु भवन पुनर्निमाण क्वचायेकाः वंगु शनिवाः उलेज्या याःगु खः ।
येँ महानगरपालिका केन्द्रनिसें दक्वं वडाया थःगु हे भवन निर्माण यायेगु नीतिकथं थुगु वडाय् सम्पदामैत्री भवन निर्माण याःगु खः। मुक्कं ६०गू लाख लागतय् थुगु सुविधासम्पन्न भवन दयेकूगु खः ।

भवन उलेज्यायासें येँ मनपा प्रमुख शाक्यं ऐतिहासिक–सांस्कृतिक सहर येँ महानगर दुने विश्व सम्पदा क्षेत्रय् लाःगु १८ वडाया थुगु सम्पदामैत्री छेँ उलेज्या याये खनाः थः तसकं लसतां भय्बिउगु धासें वय्कलं थःपिनिगु कार्यकालय् ३२ गुलिं वडाया थःगु हे सुविधासम्पन्न भवन दयेकेगु योजना दुगु व आपालं वडाया थःगु भवन निर्माण यायेगु ज्या जुयाच्वंगु नं जानकारी बियादिल ।

‘महानगरपालिकाया थःगु भवन मदयाः सेवाग्राहीपिंत समस्या वयाच्वंगु खँय् दुःख प्वंकादिसें वय्कलं धयादिल, ‘मनपाया थःगु हे भवन निर्माणया निंतिं बजेट फ्याये धुंकूसां छुं पंगःया कारणं समस्या वयाच्वंगु दु ।’ वय्कलं महानगरपालिकां आः मूर्त–अमूर्त सम्पदाया संरक्षण यासे जात्रापर्वया मौलिक परम्परायात नं प्राथमिकताय् तयागु नं जानकारी बियादिल ।

वय्कलं पुननिर्माणया अभियानयात न्ह्यःने न्ह्याकेत स्वयागु, तर इलय्ब्यलय् व्यक्तिगत व राजनीतिक स्वार्थ तयाः याइगु अवरोधया हुनिं समस्या जुयाच्वंगु व अवरोध दत धाःसां झीगु अभियानं दिपाः काइमखु धयादिल ।
येँ मनपा १८ वडाअध्यक्ष न्हुछेकाजी महर्जनया सभापतित्वय् न्ह्याःगु थुगु ज्याझ्वलय् विशेष पाहां सहरी विकास राज्यमन्त्री रामवीर मानन्धर, पाहांपिं पुंलाम्ह सांसद प्रभा वज्राचार्य, येँ मनपा सम्पदा तथा पर्यटन विभागया रामबहादुर थापा, हनुमानढोका दरवार क्षेत्र संरक्षण कार्यक्रमया रोशन शाक्य, नांजाःम्ह कलाकार सुशील राजोपाध्यायपिं झायादीगु खः । ज्याझ्वलय् १८ वडांपाखें स्ववाःयंकं जूगु धिमे प्रशिक्षणय् ब्वतिकाःपिं प्रशिक्षार्थीपिंत दसिपौ व धिमे गुरु विजय महर्जनयात कदर–पत्र नं लःल्हाःगु खः ।