यल १९ वडाय् क्षमता विकास तालिम
यल (नेपालभाषा टाइम्स)÷यल महानगरपालिका १९ वडास्थित अग्निशाला मां पुचःया ग्वसालय् मिसातय्त लक्षित यानाः क्षमता अभिवृद्धि तालिम संचालन जूगु दु । निगू दशक पुलांगु पुचःया ग्वसालय् यल महानगरपालिका १९ वडाया ग्वाहालिइ उगु तालिम संचालन जूगु खः ।
तालिमया उलेज्या यासें यल महानगरपालिका १९ वडाअध्यक्ष राजेन्द्र महर्जनं स्थानीय मिसा तःकेहेंपिंत लक्षित यानाः सीप, क्षमता, दक्षता अभिवृद्धि याइगु थुकथंया तालिम आवश्यक जूगु खँ धयादीगु दु । लक्षित वर्गया पहिचान यानाः संचालन जुयाच्वंगु तालिमपाखें ठोस उपलब्धि हासिल जुइ धइगु विश्वास कयागु धासें वय्कलं थुकथंया तालिमं मिसापिंसं नं नेतृत्व यायेगु क्षमताय् सुधार वइगु अपेक्षा यानागु दु धयादिल ।
प्रशिक्षक केके मानन्धरं थः दुने सीमित जुयाच्वंगु क्षमताया विकासं व्यक्तिया वास्तविक पहिचान जुइ धासें नवायेगु क्षमता सकसिकें दयां नं सही सदुपयोग याये मफइगुलिं व्यक्तित्वयय् प्रभाव लानाच्वनी धयादिल ।
१९ वडा ज्याकूया हे सभाकक्षय् न्ह्यानाच्वंगु तालिमया समन्वय वडा सदस्य निर्मला खड्गी यानाच्वनादीगु दुसा वडाअध्यक्ष महर्जनलिसें वडा सदस्य खड्गी व प्रविण श्रेष्ठं पर्यवेक्षकया रुपय् ब्वति कयाच्वनादीगु दु ।
पुचःया नायः रेविका महर्जनं पुचलं मिसातय्गु क्षमता व सीप विकाससम्बन्धी तालिम बीगु नापं उद्यमशीलताया प्रवद्र्धन यायेत थाय्थासय् थीथीकथंया पसः संचालन यायेगु ज्या याना वयाच्वंगु व थ्व बाहेकं मिसा, मस्तय् निंतिं अधिकारया विषयय् सचेतनात्मक ज्याझ्वः संचालन याना वयाच्वनागु जानकारी बियादीगु दु ।
LEAVE YOUR COMMENTS