महांकाल माविया ६२ क्वःगु वार्षिकोत्सव

येँ – श्री महांकाल माविया ६२ क्वःगु वार्षिकोत्सव व विद्यालय अभिभावक दिवस विद्यालय व्यवस्थापन समितिया अध्यक्ष समज्ञप्रसाद लाकौलया सभापतित्वय् जुल ।
येँ क्षेत्र नं. ६ या सांसद भीमसेनदास प्रधान मूपाहांकथं झायादीगु ज्याझ्वलय् वय्कलं प्राज्ञ डा. तीर्थबहादुर श्रेष्ठ, समाजसेवी इश्वरमान ताम्राकार, शिक्षिका रिमा जोशीयात हनापौ देछासे सम्मान यानादीगु खः ।

ज्याझ्वलय् एसइइ परीक्षाय् सर्वोत्कृष्ट ल्याः हयादीम्ह प्रमिशा श्रेष्ठ व यजु जोशीयात महांकाल विशिष्ट पदक–२०६७ लिसें एसइइ परीक्षा उत्तीर्ण विद्यार्थीतय्त लुमन्ति चिं नं लःल्हानादीगु खः ।

अथे हे शिक्षिका कविता ताम्रकारं एसइइ परीक्षाय् अप्वः ल्याः हयादीपिं विद्यार्थी दलबहादुर प्रधान व प्रमिशा श्रेष्ठयात दिव्यरत्न स्मृति पुरस्कार वापत म्हतिं स्वीन्यासः तका दां व दसिपौ लःल्हानादीगु खःसा एसइइ परीक्षाय् नेपाली विषयय् अप्वः ल्याः हयादीपिं प्रमिशा श्रेष्ठ व यजु जोशीयात प्रेममाया–केशवलाल लुमन्ति सिरपाः कथं म्हतिं न्यासः तका दां, पदक व दसिपौ लःल्हानादिल ।

थुकथं हे न्यागू तगिंया सविना भुजेलयात प्रेममाया केशवलाल छात्रवृत्तिकथं प्यद्वः तका दां लःल्हाःगु ज्याझ्वलय् नेपालभाषा साहित्यकार नापं पुलांम्ह प्रधानाध्यापक पशुपतिमान प्रधानं एसइइ परीक्षाय् अप्वः ल्याः हयादीपिं प्रमिशा श्रेष्ठ व दलबहादुर प्रधानयात कामाक्ष देवी पारु प्रधान लुमन्ति सिरपाःकथं निद्वः तका दां, पदक व दसिपौ लःल्हाःगु खः ।

ज्याझ्वलय् मय्गु रेणुका प्रधानं प्रभादेवी स्मृति पुरस्कार वापत अप्वः ल्याः हःपिं सुशील चौधरी व सुहाना शाक्ययात म्हतिं स्वीन्यासः तका दां व सरिता श्रेष्ठयात न्हय्द्वः तका दांया प्रभादेवी छात्रवृत्ति लःल्हाःगु खःसा शिक्षिका कालिका शिवाकोटीं जनसंख्या विषयय् अप्वः ल्याः हयादीम्ह सुनेना शाक्ययात न्यासः तका दां लःल्हानादीगु खः ।

विद्यालयया सह प्रधानाध्यापक वीरेन्द्रमान वज्राचार्यं लसकुस यानादीगु ज्याझ्वलय् प्रधानाध्यापक सन मानन्धरं विद्यालयया प्रगति प्रतिवेदन, शिक्षा, विकास व समन्वय इकाइ प्रमुख नन्दलाल पौडेल, सम्मानित व्यक्तित्वपिं प्राज्ञ डा. तीर्थबहादुर श्रेष्ठ, ईश्वरमान ताम्राकार व विद्यार्थी प्रमिशा श्रेष्ठं थःथःगु नुगःखँ प्वंकादीगु खः ।

सम्बन्धित बुखँ

LEAVE YOUR COMMENTS