अस्पतालपाखें संक्रमण जूगु रिपोर्ट गोप्य

यल (नेपालभाषा टाइम्स) – थनया धापाखेलय् च्वंगु सुमेरु अस्पतालं वासः याकेगु झ्वलय् सीम्ह छम्हेसिया रिपोर्ट गोप्य तःगु खँ सीदुगु दु। फम्पि छेँ जुयाः अस्पतालय् ज्या याइम्ह रंजिता नांया कर्मचारीयाके परीक्षणया इलय् कोभिड-१९या सकतां लक्षण खने दुगु खः ।

फम्पिइ च्वंम्ह उम्ह मिसा अस्पतालया हे कर्मचारी जूगु व वासः याकेगु झ्वलय् मदुम्ह उम्ह मिसाया रिपोर्ट अस्पतालं गोप्य तःगु जानकारी अस्पतालया हे छम्ह कर्मचारीं नां मकनेगु शर्तय् बिउगु दु। कोरोनां सीगु धालकि अस्पतालय् सिल याइगु जक मखु, अस्पतालया कर्मचारीतय्त पीपीईया माग याःसां बेवास्ता यानाच्वंगु उम्ह कर्मचारीं धाःगु दु ।

सीम्ह कर्मचारीया सम्पर्कय् वःपिं मेपिं कर्मचारीयात आइसोलेशनय् तयेगु बाहेकं स्वास्थ्य सुरक्षाया छुं नं मापदण्ड पूवंकेगु ज्या मजूगु नं उम्ह कर्मचारीं जानकारी बिउगु दु। उखे फम्पिस्थित मिसा छेँय् सम्पर्कय् वःपिंत सेखं चाइगु, ज्वरो वइगु लक्षण खने दयेवं वया थःथितिपिंसं रिपोर्ट माग याःसां नं मबिउगु नं सी दुगु दु । अस्पतालं लबः कायेगु लोभं रिपोर्ट गोप्य तःगु धासें अस्पतालया हे कर्मचारीतय्सं असन्तुष्टि प्वंकाच्वंगु दु ।