पोलय् तयातःगु तार चीकेत प्राधिकरणया उजं

येँ (नेपालभाषा टाइम्स)- नेपाल विद्युत प्राधिकरणं पोलय् अस्तव्यस्त जुइक तयातःगु इन्टरनेट व केबल टेलिभिजनया तार व्यवस्थापन यायेत पीन्यान्हुया ई बिउगु दु । म्हिगः छगू सार्वजनिक सुचं जारी यासें प्राधिकरणं थःगु पोल छ्यलाः अव्यवस्थित रुपय् सालातःगु तार व यखानातःगु उपकरणत पीन्यान्हुया दुने व्यवस्थापन यायेत निर्देशन बिउगु खः ।

लाथेपाथे तयातःगु तारं शहर कुरुप दयेकूगु, मिं नये फइगु लिसें विद्युतीय दुर्घटना अप्वःगु, विद्युत सेवा प्रवाहय् लिच्वः लाःगुलिं गम्भीर ध्यानाकर्षण जूगु खँ सुचनय् धयातःगु दु । मिं नइगु नियन्त्रण यायेत व विद्युत सेवा बल्लाकेमाःगु खँ धासें दूरसञ्चार व टेलिभिजन सेवा प्रदायक संस्थायात प्राधिकरणं मापदण्ड कथं तार व्यवस्थापन यायेत निर्देशन बिउगु खः ।

प्राधिकरणं राउटर, रिपिटर, एक्ट्रयाक्टर, अप्टिकल फाइबर वितरण बक्स, जोइन्ट क्लोजर थेंज्याःगु उपकरण पोलया छगू जक साइडय् झ्वःलिं मसंक तयेत, कुतुं मवइगु कथं क्लिप ब्याण्ड छ्यलाः तयेत नं निर्देशन बिउगु दु ।

उकथं हे प्राधिकरणं ज्या ख्यलय् मवःगु तार व उपकरण तत्काल पोलं चीकेत नं निर्देशन बिउगु दु । पोलय् तार हिनाः यमखायेत व तार अःपुक म्हसीके फइ कथं केबल ट्याग व मार्किङ यायेत नं निर्देशन बिउगु दु ।

अथे हे प्राधिकरणं फयांफछि अप्वः कोर दुगु केवल सालाः सेवा प्रदायकं सेवा बीगु व्यवस्था यायेत नं निर्देशन बिउगु दु । तार सतक वारपार जुइक मसालेत व सालातःगु खःसा उकियात चीकेत नं निर्देशन बिउगु दु ।

लिसें प्राधिकरणं सुधारया ज्या यानाः प्राधिकरणया विद्युत वितरण केन्द्रय् जानकारी याकेत नं निर्देशन बिउगु दु । यदि निर्देशन कथं ज्या मयात धाःसा प्राधिकरण थम्हं हे अव्यवस्थित तार चीकेगु व उकिया खर्च सम्बन्धित सेवा प्रदायकपाखे हे म्हयेगु ख्याच्वः नं प्राधिकरणं बिउगु दु ।

सम्बन्धित बुखँ

LEAVE YOUR COMMENTS