संग्रहालय चाल, चहलपहल अप्वल

यल (नेपालभाषा टाइम्स) – यलया पाटन संग्रहालय सर्वसाधारणया निंतिं चायेकूगु दु। कोरोना भाइरस (कोभिड-१९)या कारणं बन्द जुयाच्वंगु पाटन संग्रहालय सर्वसाधारणया निंतिं चायेकेवं चहलपहल नं अप्वःगु दु ।

उगु संग्रहालय कोभिड-१९या कारणं लकडाउनया इलंनिसें हे बन्द जुयाच्वंगु खःसा वंगु मंसिर ८ गतेनिसें सर्वसाधरणया निंतिं चायेकूगु खः । यलया संग्रहालय चायेकेवं चहल पहल नं अप्वःगु दु । संग्रहालयया प्रमुख सुरेशमान लाखेयाकथं थौंकन्हय् सुथसिया १० ताःइलंनिसें सनिलया ४ ताःईतक संग्रहालय चायेकेगु ज्या जुयाच्वंगु दु । वय्कलं कनादीकथं संग्रहाल चाःगु न्हापांगु न्हिं नीन्याम्हेसिनं अवलोकन याःगु खःसा अनंलि शनिवाःकुन्हु १४० म्हेसिनं तक अवलोकन याःगु खः । थौंकन्हय् मेमेगु दिनय् करिब ७०-८० म्ह तक संग्रहालय अवलोकन यायेत वयाच्वंगु दु ।

कोरोना महामारीया कारणं बन्द जुयाच्वंगु संग्रहालय चायेकेवं स्वदेशीलिसें विदेशी पर्यटकत नं अवलोकनया निंतिं वयेगु यानाच्वंगु वय्कलं कनादिल । छवाः न्ह्यः यलया कात्ति दबुलिइ निन्हुयंकं कात्तिप्याखं क्यनेगु झ्वलय् नाट्य कला महोत्सवया किपा व वृत्तचित्रया नं ब्वज्या जूगु खः । ब्वज्याय् स्वीपाः नृत्यया किपा लिसें करिब २४ मिनेटया वृत्तचित्रया नं क्यनेगु ज्या जूगु खः ।