स्वनिगलय् छन्हुं १३९ म्हेसिके कोरोना

येँ (नेपालभाषा टाइम्स) – स्वनिगलय् म्हिगः छन्हु हे १३९ म्हेसिके कोरोना संक्रमण पुष्टि जूगु दु। स्वनिगलय् छन्हुं संक्रमित जूपिनि ल्याखय् थ्व आःतकया दकलय् अप्वः खः । म्हिगः स्वनिगलय् संक्रमण जूपिं मध्ये येँ १०९ म्हेसिके, यल २१ व ख्वपय् च्याम्हेसिके संक्रमण खनेदुगु खः । म्हिगः जक नेपाःन्यंकं ४८४ म्हेसिके संक्रमण खनेदुगु खः ।

मेखे म्हिगः छन्हुं हे च्याम्ह कोरोना संक्रमिततय् ज्यान वंगु दु। नेपालय् कोरोना संक्रमणं छन्हुं सीपिनि ल्याखय् नं थ्व दकलय् अप्वः खः । थुकिया लिसें नेपालय् कोरोना संक्रमणं सीपिनि ल्याः नं ९२ म्ह थ्यंगु दुसा कोरोना संक्रमित जूपिनि ल्याः २४ हजार ४३२ म्ह थ्यंगु दु। सरकारं लकडाउन खुल्ला यायेधुंकाः स्वनिगलय् न्हियान्हिथं संक्रमितत अप्वया वनाच्वंगु दु। आः नं स्वनिगलय् जक १२५७ म्ह सक्रिय संक्रमितत दनि । थुकी मध्ये येँय् १०४० म्ह, यलय् १४४ म्ह व ख्वपय् ७३ म्ह सक्रिय संक्रमितत दनिगु खँ धाःगु दु ।

मेखे महाराजगन्जय् च्वंगु त्रिवि शिक्षण अस्पतालय् च्वंपिं खुम्ह स्वास्थ्यकर्मीयाके कोरोना संक्रमण जुइवं अस्पतालया इमर्जेन्सी वार्ड तकं बन्द याःगु दु ।