ने. सं. ११४६ अनलागा दुतिया -

ल्हाः तयाः वकिलतय् ल्वापु

येँ – प्रधानन्यायाधीश चोलेन्द्र शम्शेर जबराया समर्थक व विरोधी वकिलतय् दथुइ ल्हाः तयाः ल्वापु जूगु दु । म्हिगः नेपाल बार दुने हे निम्ह वकिलतय् दथुइ ल्हाः तयाः ल्वापु जूगु खः । म्हिगः वकिलपिं विराट न्यौपाने व भूमिनन्द चुँडाल दथुइ ल्हाः तयाः ल्वापु जूगु खः ।

प्रधानन्यायाधीशयात कयाः म्हिगः नेपाल बारया बैठक च्वनाच्वंगु खःसा उगु इलय् चुँडालं सञ्चारकर्मीतय्त इजलास चायेकेमाःगु धासें अन्तर्वार्ता बियाच्वंगु खः । वहे इलय् न्यौपानें अथे छाय् धयागु धकाः न्ह्यसः न्यंगु खः ।

चुँडालं सञ्चारकर्मीलिसे खँ ल्हायेगु झ्वलय् धयादिल, ‘न्यायाधीशतय्सं यानाच्वंगु बेञ्च बहिष्कार गलत खः, अदालत बन्द याये मजिउ, अदालत चायेकेमाः, उकिया लिच्वः कानुन व्यवसायीपिंत नं लानाच्वंगु दु ।’ वयां लिपा न्यौपानें चुँडालयात ल्हाः वाःगु खः । थ्वहे झ्वलय् सञ्चारकर्र्मीतलिसे खँ ल्हासें चुँडालं थम्हं कानुनी उपचार मालेगु खँ धाःगु दु ।

प्रधानन्यायाधीशयात कयाः निम्हेसिया दथुइ विवाद तच्वया वनेवं अभिवक्ता न्यौपानें चुँडालयात घ्वाना छ्वयेवं निम्हेसिया दथुइ ल्हाःल्हाः तयाः ल्वापु जूगु खः । न्यौपाने प्रधानन्यायाधीशया राजी–नामाया पक्षय् दुसा चुँडाल धाःसा बेञ्च बहिष्कारया विरुद्धय् दुगु खँ सीदुगु दु । म्हिगः प्रधानन्यायाधीशं राजीनामा मबिल धाःसा आन्दोलन यायेगु धासें बार कार्यसमितिया बैठक च्वनाच्वंगु इलय् उगु ल्वापु जूगु खः । न्यौपाने व चुँडालया दथुइ ल्वापु जुयाः चुँडालया कोट गूगु खः ।

न्यायाधीश व कानुन व्यवसायीया बहिष्कारया कारणं म्हिगः नं सर्वोच्च अदालतय् सुनुवाइ मजुल । प्रन्या जबराया राजीनामा माग यासें सर्वोच्चया न्यायाधीश व नेपाल बार एसोसिएसनं बेञ्च बहिष्कार याना वयाच्वंगु खः ।

न्यायाधीशतय् विरुद्ध रिट दर्ता
सर्वोच्च अदालतया न्यायाधीशतय्सं इजलास बहिष्कार यानाच्वंगु विरुद्ध सर्वोच्च अदालतय् हे रिट लाःगु दु । न्यायाधीशतय् बहिष्कारं बन्दी प्रत्यक्षीकरण लगायतया मुद्दा प्रभावित जुयाः न्यायया हक उल्लंघन जूगु धासें पेशीया धलखय् दुगु मुद्दात स्वयेत परमादेश माग यासें म्हिगः सर्वोच्च अदालतय् रिट दर्ता जूगु दु ।

कृष्ण प्रसाईं लगायतया अधिवक्तातय्सं झिंन्याम्ह न्यायाधीश विरुद्ध दर्ता याःगु रिटय् म्हिगःनिसें स्वच्छ सुनुवाइया नितिं परमादेश जारी यायेत माग यानातःगु दु ।

रिटय् मुद्दाया सुनुवाइ मजूगुलिं बन्दी नापं कुनातःपिंत अपूरणीय क्षति जुइगु दावी यानातःगु दु । रिट निवेदनय् धयातःगु दु, ‘सर्वसाधारणया बन्दी प्रत्यक्षीकरण लगायतया मुद्दाय् तत्काल सुनुवाई जुइमाःगु संविधानया धारा २० बमोजिम न्याय सम्बन्धी हक उल्लंघन जूगुलिं थुकिया दथुइ छुं माननीय न्यायाधीशपिं बिदाय् च्वनाच्वंगु जानकारी वःगु दु, विपक्षी माननीय न्यायाधीशज्यूपिनिगु नामय् थनिंनिसें संविधानया धारा १३३ (२), ३ बमोजिम पेशी सूचीया गुगुं नं मुद्दा पने मते, इजलासय् च्वनाः स्वच्छ सुनुवाइ या धइगु व्यहोराया परमादेश जारी याना बीमाल ।’