यंगालय् सामुदायिक स्वास्थ्य क्लिनिक

येँ- येँ महानगरपालिकां सामुदायिक सहरी स्वास्थ्य क्लिनिक संचालनय् हःगु दु । येँ महानगरपालिकां २१ वडाया यंगाः त्वालय् उगु क्लिनिक संचालनय् हःगु खः ।

येँ महानगरं प्रमुख विद्यासुन्दर शाक्य व २१ वडाअध्यक्ष उदय चुडामणि वज्राचार्यं वंगु आइतवाः मंकाःकथं उगु क्लिनिकया उलेज्या यानादीगु खः ।

क्लिनिक उलेज्याझ्वलय् नवासें येँ महानगर प्रमुख शाक्यं येँ महानगरं स्वास्थ्य व शिक्षाया ख्यलय् लगानी अप्वयेका यंकाच्वनागु खँ धयादिसें महानगरं संचालनय् हःगु सामुदायिक सहरी स्वास्थ्य क्लिनिकया आकर्षण अप्वयेका यंकाः सेवाग्राहीया ल्याः नं अप्वयेकेमाःगु दु धयादिल ।
‘झीसं महानगरवासीया जक उपचार यानां मगाः । देश विदेशं येँय् वइपिं सकसिगुं उपचार याना बीमाः ।’ येँ महानगर प्रमुख शाक्यं धयादिल, ‘महानगरं संचालन याःगु क्लिनिकय् सेवाग्राहीया आकर्षण अप्वयेके फत धाःसा ततःधंगु अस्पतालय् ल्वगितय् चाप म्हो जुइ । थथे जुल धाःसा ततःधंगु अस्पतालय् जुइगु जटिल ल्वय्या उपचार नं सहज जुइ ।’

लगानी अप्वयेका यंकेगु तर सेवाग्राहीया ल्याः धाःसा म्हो जुजुं वन धाःसा उकिं यानाः लगानी नं सितिं वनी धासें थःपिंसं यानागु लगानीपाखें आपालं सेवाग्राहीतय्सं लबः काये दयेमा धइगु थःपिनिगु चाहना जूगु वय्कलं धयादिल ।

वडाअध्यक्ष वज्राचार्यं सरकारं जनताया आधारभूत स्वास्थ्य सेवा वडापाखें हे बीगु कथंया व्यवस्था यानाः उकथंया हे वातावरण तयार याःगु खँ कनादिल ।

येँ महानगरं छगू वडा छगू सामुदायिक सहरी स्वास्थ्य क्लिनिकया नीति दयेकाः व हे कथं दक्वं वडाय् क्लिनिक स्थापना याःगु खः । थौंकन्हय् येँ महानगरया २१ गुलिं वडाय् सामुदायिक सहरी स्वास्थ्य क्लिनिक संचालन जुयाच्वंगु दु । वडा भवन निर्माण मजूतलेया निंतिं आःयात यंगाः क्लबया भवनय् क्लिनिक संचालन याइगु जुयाच्वंगु दु ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु