लकडाउन इलय् २२१८ म्हेसिया आत्महत्या

येँ (रासस) – कोरोना संक्रमणया कारणं सरकारं लागू याःगु लकडाउनया इलय् नेपाः दुने जक २२१८ म्हेस्यां आत्महत्या याःगु दु । प्रहरी प्रधान कार्यालयया कथं चैत ११ निसें साउन ४ गते तक लकडाउनया इलय् थीथी उपाय नालाः थुलि मनुखं आत्महत्या याःगु खः । उकी मिजंत ११७२ म्ह, मिस्त ८११ म्ह, मिजं मस्त ९४ म्ह व मिसा मस्त १४१ म्ह दु ।

प्रहरीया कथं यग्गाना अप्वः मनूतय्सं आत्महत्या याःगु दु । यग्गानाः १८२८, विष नयाः ३४६, तिंन्हुयाः १९ म्ह, दुबे जुयाः १२ म्ह, ल्वाभःपाखें च्याम्ह, मि च्याकाः प्यम्ह व करेन्टं ज्वनाः छम्हेस्यां आत्महत्या याःगु खः । आत्महत्याया मू कारण मानसिक तनाव जूगु खँ प्रहरीं धाःगु दु ।